ABALANDELI BAVALEKE IMILOMO NGEBHOLA LE-ENGLAND
IVALE imilomo yabaningi i-England ifinyelela kuma- quarter final eNdebe yoMhlaba ngemuva kokuhlula iColombia ngo-4-3 wamaphenathi ngoLwesibili kwilast 16 yalo mqhudelwano oqhubeka eRussia.
Lo mdlalo ubuphele zibambene ngo-1-1 esikhathini esejwayelekile. Ukunqoba kwe-England kuyiqhathe neSweden esigabeni sama- quarter-final. Lo mdlalo uzokuba ngoMgqibelo ngo-16h30. ISweden iwashise ijezi iSwitzerland kuba ngu-1-0 esigabeni sikalast 16.
IRussia izokwamukela iCroatia ngawo uMgqibelo ngo-20h00. IRussia ne-England bebenganikwa lutho olutheni kulo mqhudelwano ozokuba nezingqwele ezintsha njengoba iGermany ihlulekile ukuvikela isicoco sayo esinqobe eBrazil ngo-2014. IGermany iphume ekuseni emqhudelwaneni wanonyaka.
I-England bekukhalwa ngokuthi kayinaye umdlali okwaziyo ukuyithwala ezimweni ezinzima. Nokho-ke uHarry Kane ongukaputeni, usalokhu eyihole njengesibani. Lo mgadli nguyena ozihola phambili ngokuhlohla amagoli kulo mqhudelwano njengoba eseyibhakuzise amahlandla ayisithupha inethi.
Ulandelwa nguRomelu Lukaku waseBelgium onamane. UKane usethubeni lokumehlula uLukaku ngoba nguyena onikwa amaphenathi kwi-England ekubeni kwiBelgium eshaywa ngu-Eden Hazard ongukaputeni.
Lokhu kusho ukuthi uLukaku uthola ithuba lokuhlohla amagoli emdlalweni ovulelekile kuphela. IRussia iye kulo mqhudelwano izinto ziyiphika njengoba ibingenzi kahle emidlalweni yokuzifudumeza.
ICroatia ihlule iDenmark ngo-32 wamaphenathi koka-last 16, kanti iRussia iwashise ijezi iSpain ngo-4-3 wamaphenathi.