UGQASHUKE USEMUSHA UMSHADO WABEBHOLA
KUGQASHUKE ifindo lomshado lisaqedwa kuboshwa phakathi kwe-Alexander Black Aces yaseGauteng neMaccabi FC yasesifundazweni esifanayo engomakoti beNational First Division (NFD).
Izikhulu ze-Aces bezifuna ukuba iMaccabi FC icijwe nguJacob “Cellular” Sakala kuthi uMokete Tsotetsi abe lisekela. Nokho ukugqashuka kwegoda sekuqinisekise ukuthi basazoqhubeka nemisebenzi yabo u-Ashley Makhanya noTyrone Damon obebhekene nokulola onozinti. Kuthiwa iMaccabi FC ibinesivumelwano nezikhulu ze-Aces sokusebenzisana okubukeka sesiphelile. Kuthiwa izikhulu ze-Aces ziyilekelele iMaccabi FC ukuze ingene kwiNFD.
ILANGA lithole ukuthi lo mshado kawusekho ngenxa yokungaboni ngaso linye ezikhulwini zala makilabhu. I-Aces isihlela ukuqhubeka nokudlala kwiSouth African Football Association (Safa) Gauteng ABC Motsepe League ngesizini ezayo.
UGordon Masondo obemele i-Aces, ukuqinisekisile ukuthi kakusekho okubahlanganisa neMaccabi FC. Uthi kube ngaphezu kwamandla kwazise izinhloso abanazo nezabo kazihambisani. Uthi yingakho bebone kungcono ukuba behlukane.
U-Allan Norman ongumnikazi weMaccabi FC, uthe kabakaze babe nomshado ne-Aces. Uthi bayabazi ukuthi bakhona ebholeni kodwa kabayona ingxenye yabo. Uthi ngamanga aluhlaza ukuthi kade beyingxenye yekilabhu. Uthi emidlalweni yokuhlunga babezifikele njengabalandeli bebhola.
Kuthiwa uCollins “Ntofontofo” Mbesuma osize kakhulu iMaccabi FC kweyokuhlunga, angase abuyele kwi-Aces. Sekuwumlando ukuthi iMaccabi FC ingene neTS Sporting yaseMpumalanga kulesi sigaba esiphakela i-Absa Premiership amakilabhu asevuthiwe.