OweSafa uphonsela iBafana inselelo
Uthi kumele ifunde kwiFrance ngoMbappe
UKUVELELA kukaKylian Mbappe (19) waseFrance kwiNdebe yoMhlaba eqhubeka eRussia kushiye imibuzo ngokunikwa kwabadlali abasebancane ngeminyaka yobudala ithuba lokugijimela iBafana Bafana.
IFrance iqhathwe ne-Uruguay emdlalweni we- quarter final yeNdebe yoMhlaba ozokuba kusasa ngoLwesihlanu ngo-16h00 eRussia.
UMazwi Mkhize osemakomidini amabili eSouth African Football Association (Safa) kuzwelonke, uthe kuyadabukisa ukuthi amazwe asethuthukile kawanqikazi ukubophela abadlali abasebancane. Uthi kwiBafana Bafana umdlali okuthiwa usemncane ngoseneminyaka engu-24 ubudala.
UMkhize ubekhuluma izolo ngoLwesithathu ekuseni ngesikhathi kuvaleliswa abadlali baka-U/19 beKZN Academy abazohamba bayothekela ulwazi ePortugal kule nyanga. UMkhize utshele abadlali ukuthi kumele basebenze ngokuphindiwe ukuze bezokuba ngabokuqala ukuboshelwa kwiBafana bengakafiki eminyakeni engu-20 ubudala.
UMbappe uzifake emabhukwini omlando ngokuphula irekhodi eselihlale iminyaka engu-60 lomdlali ovalele amagoli amabili emdlalweni owodwa kwiNdebe yoMhlaba engakayihlanganisi iminyaka engu-20 ubudala. Leli rekhodi beliphethwe nguPele waseBrazil.
UMkhize uthi abadlali beKZN Academy banethuba elikahle ngoba lesi sifundazwe yisona sodwa esinesikhungo esihlelekile. UThabo Cele obedlala kulesi sikhungo ngaphambi kokubhekisa amabombo ePortugal, uke wabizwa kwiBafana ebidlala kwiCosafa Cup. Nokho-ke akabonwa esikwatini semidlalo emqoka. Lo mdlali ubizwe nguStuart Baxter ngemuva kokudlala ingcwenga yebhola kwiNdebe yoMhlaba ka-U/20 ebingonyaka odlule eKorea Republic.
UMkhize uthi ukubizwa kukaCele kwiBafana, kuyakhombisa ukuthi iKZN Academy ingakwazi ukukhiqizela iBafana abadlali abasebancane. Uthi kumqoka ukuba beyiSafa babe nemithetho eqondene nokudlaliswa kwabadlali abasebancane. Uthi iNingizimu Afrika inenqwaba yabadlali bezinga likaMbappe, kodwa kabanakiwe ngoba kwaziwa ukuthi kumele babe neminyaka engaphezulu kuka-25 kuyima benikwa ithuba.
Uthi namakilabhu e-Absa Premiership asehudula izinyawo ukusebenzisa abadlali abasebancane ekubeni u-Ephraim “Jomo” Sono uqale ukudlubha ijezi leOrlando Pirates eneminyaka engu16 nje kuphela ubudala.
ULionel Messi wase-Argentina, uCristiano “CR7” Ronaldo wasePortugal noNeymar Jnr waseBrazil, bayingxenye yabadlali abafakwe emaqenjini amakhulu esizwe besebancane.
Ukubuyela emdlalweni weFrance ne-Uruguay, kubhekeke ukuba kusiphuke utshani njengoba la mazwe ebophele izibabuli zabadlali.
Ukwenza kahle kwawo, kwenze izingqapheli zawathipha ukuhamba ibanga elide kulo mqhudelwano. Nokho-ke kusasa kukhona okumele agoduke. I-Uruguay isathembele kuLuis Suarez noRobeto Cavani oke waba nokuthinteka, kanti iFrance igabe ngoMbappe, uPaul Pogba, u-Antoine Griezmann ukubala abambalwa.