Ithuba lokungenela okaMandela mahhala
Uzogujwa ngomjaho unyaka kaMadiba no-Albertina Sisulu
KUZOPHISWANWA ngemingenelo eyikhulu kubagijimi abanenhlanhla yokuba babambe iqhaza bhusende kwiMandela Day Marathon ukugubha iminyaka elikhulu kwazalwa uNelson Mandela owaba ngumengameli wokuqala wentando yeningi eNingizimu Afrika.
Lo mjaho uzokuba mhla ka-26 kuNcwaba (August) kanti uzoqala eMgungundlovu usongwe eMandela Capture Site, eHowick.
Umjaho wanonyaka uzokube ugubha unyaka wesikhombisa wasungulwa. Kulindeleke ukuba ungenelwe ngabasubathi abangu-18 500.
Lo mjaho uhlelwe wuMgungundlovu Municipality kanti uhlukaniswe izigaba eziyisikhombisa. IMarathon izokuba ngeSonto isukela eManaye Hall, eMbali, isongwe eHowick Capture Site. I-21km iqala kwiHalf Way ye-42km bese i-10km iqala edolobheni eHowick isongwe eCapture Site.
Ngosuku olwalundela i-mara- thon, kuzokuba neTrial Running, iFun Run, umjaho wamabhayisikile neTriathlon. Izingqwele zalo mjaho zizohlomula ngo-R100 000 kwi- marathon bese kuthi ozophula irekhodi athole u-R50 000 ngaphezulu.
Irekhodi labesilisa ngu-2:27, liphethwe nguThobani Chagwe. Elabesifazane ngu-2:47, lenziwa ngu-Irvette van Zyl.
Womabili la marekhodi aqoshwe ngo-2014.
“Nonyaka sizophisana ngemingenelo kubasubathi abayikhulu abazokube benza i-marathon ngenhloso yokugubha lo nyaka okuhlonishwa ngawo uMandela nomama u-Albertina Sisulu. Umjaho wanonyaka kuzokube kuhlonishwa ngawo la maqhawe omzabalazo.
Ukuze abasubathi bazitholele imingenelo yamahhala kufanele bafake isithombe esihambisana nomlayezo ngokubamba kwabo iqhaza kwiMandela Day Marathon yanonyaka ukuzibeka ethubeni lokuqokwa kwabalikhulu.
“Sicela abasubathi ukuba baqinisekise ukubhalisa kusenesikhathi ngoba sizovala ukwamukela imingenelo mhla ka-31 kwephezulu noma uma sesithole isibalo sabasubathi abangu-18 500 sekuhlanganiswe wonke amabanga,” kusho uMbeko Nzimande woMgungundlovu Municipality.
Abafuna ukuzibeka enhlanhleni bangangena kwi- website ethi: www. mandeladaymarathon.org.za noma kwekamasipala ethi: www.umdm. gov.za ukuthola olunye ulwazi noma bashayele uMbeko kwethi: 074 312 9933.
Abasubathi baKwaZulu-Natal bazokhiphana inkani kwiSisonke 10km Challenge ezokuba ngeSonto kusuka ngo-7 ekuseni eNanda Dam. Ngolwazi kushayelwa uSihle Shange kwethi: 073 470 9842.
AbeCross Country bazoshukana emlenzeni wesi-9 weCross Country ozokuba ngoMgqibelo kusuka ngo-11 ekuseni eMgungundlovu.
Abafuna ulwazi ngalo mjaho ohlelwe yiCollegians bangashayela kwethi: 031 312 9374.