Singase sinyukele ku-18 esawePSL
Kubukeka isishaywa yizinduku zayo i-Iron Duke
IPREMIER Soccer League (PSL) kubukeka izolanyulelwa yisinqumo sokwandisa isibalo samakilabhu enkingeni ebhekene nayo emuva kokuvunwa yicala kwe-Ajax Cape Town.
I-Ajax ibuyiselwe amaphuzu ebiphucwe wona ngokudlalisa uTendai “Fire” Ndoro osolwa ngokudlalela amakilabhu amathathu ngesizini eyodwa okuphikisana nemithetho yeFifa.
I-PSL ibize umhlangano ophuthumayo wesigungu esiphezulu onamuhla ngoLwesine ukuzama ukuthola isixazululo kulolu daba olususwe yile nhlangano eholwa nguDkt Irvin “Iron Duke” Khoza iphikisana nesinqumo seDispute Resolution Chamber (DRC) yayo (iPSL), sokuba i-Ajax iqhubeke nokudlalisa uNdoro.
I-PSL iphikise lesi sinqumo sekubalwa amahora ukuba i-Ajax ibhekane ne-Orlando Pirates edliwe ngo-3-1 eCape Town. Emuva kokuba kucacile ukuthi iPirates iphunyukwa yiligi, le kilabhu eholwa nguKhoza ilihoxisile icala ebilifake nge-Ajax ngokudlalisa uNdoro. Nokho amanye amakilabhu aliqhubile. I-PSL ibuye yazigwaza ngowayo ivumela ukuqhubeka kwemidlalo yokuhlunga egijinywe yiBlack Leopards (egcine iyinqobile), iJomo Cosmos nePlatinum Stars.
Umhlangano wanamuhla uzohanjelwa nguKhoza, uKaizer Motaung, uStan Matthews, uDavid Thidiela, uMato Madlala (oyibamba lesikhulu esiphezulu kwiPSL), uKhumbulani Khonco, uJose Ferreira noRejoice Simelane.
Kubuye kwamenywa no-Ari Efstathiou ongumnikazi we-Ajax.
Ukubuyiselwa kwe-Ajax amaphuzu kunyomfe zonke izinhlelo zePSL kwazise ivele isinamakilabhu angu-16 emuva kokuba iLeo- pards idle ubhedu emidlalweni yokuhlunga.
Esinye isikhulu ebesikhona kubunjwa iPSL ngo-1996/97, kodwa esicele ukuba lingalokothwa lifakwe kulolu daba igama laso, sithe kubukeka kuwukwandisa isibalo samakilabhu senyukele ku-18 kuphela isixazululo esingemukelwa yizona zonke izinhlangothi ezithintekayo kulolu daba.
“Isigungu esiphezulu sePSL kumele siqikelele ukuthatha isinqumo esingeke sizisole ngaso. Leso sinqumo-ke ngesokwandisa amakilabhu anyukele ku-18. Kumele ivele ifake i-Ajax neJomo Cosmos eqede isizini ilele endaweni yesithathu kwiNational First Division (NFD).
“Kayikho into engalwelwa yiPlatinum Stars ngoba vele izembe liyigence umkhanya kabili. ILeopards ngeke ikuvume ukuba kuphindwe imidlalo eyinqobile yokuhlunga nakuba ijaji selishilo ukuthi ibingekho emthethweni. Nokho iPSL kumele izisole yona ngokudlalisa imidlalo yokuhlunga ekubeni icala lisaqhubeka,” kusho lesi sikhulu. Ngesikhathi uKhoza ekhuluma neLANGA emasontweni ambalwa edlule, walibeka ngesihloko elokuthi iPSL ingangena ezindlekweni ezinkulu uma ingathatha isinqumo sokwandisa amakilabhu, akhuphukele ku-18 esuka kwangu-16.
Wakhala ngesimo somnotho ontengantengayo. Ikilabhu iyinye ithola u-R3 million kwiPSL sekuhlangene zonke izindleko zenyanga.
I-PSL isidla ngamapayipi nje, yingenxa yesinqumo seJaji uDenise Fisher okhiphe isinqumo sokuba i-Ajax ibuyiselwe kwi-Absa Premiership emuva kokuba igencwe yizembe emasontweni ambalwa adlule ilahlwa yicala nguAdvocate uWilliam Mokhari.
IJaji uFisher lisichithile isinqumo sika-Adv Mokhari ngesikhathi lethula esalo isinqumo ngoMsombuluko eJohannesburg High Court.
IJaji uFisher lithe yiFifa kuphe- la enamandla okukhipha isinqumo ngalolu daba. Isinqumo sikaJaji Fisher sichaza ukuthi AmaZulu FC asebuyele kwi- top 8 aphume kuyona emuva kokuba iSuperSport United ihlomule ngamaphuzu amathathu e-Ajax. La maphuzu asebuyiselwe kwi-Ajax.
Kuthiwa u-Ephraim “Jomo” Sono ongumnikazi weCosmos usibheke ngabomvu isinqumo esizothathwa yisigungu sePSL kanjalo nabaphathi beLeopards abanqobe eyokuhlunga. Isinqumo sikaFisher siphinde sakubeka kwacaca ukuthi imidlalo yokuhlunga ifana nengekho emthethweni.
Kakade vele amakilabhu abengu-18 ngesikhathi kusungulwa iPSL ngo-1996. Nokho ancishisiwe ngo-2002 ukuhlelela imikhankaso yakuleli yokuza kweNdebe yoMhlaba edlalelwe lapha ngo2010, ngemuva kokuba sihlulwe ngeka-2006 yona esingathwe yiGermany. IFree State Stars eke yabizwa ngeQwaqwa Stars neRia Stars badayisa ngoR8 million ikilabhu iyinye amalungelo abo okudlala kwiPSL.