Izakhamizi zisazodonsa kanzima emnothweni
UMA izakhamizi zase Ningizimu Afrika zingabuzwa ukuthi yini ebaluleke kakhulu nezikhathazayo empilweni, iningi lingakhala ngesimo esintengayo somnotho nokwesweleka kwemisebenzi.
Ukuntenga komnotho kunomthelela omkhulu ekwehleni kwamandla erandi uma liqhathaniswa ne- dollar lase-United States of America (USA).
Ukwehla kwalo kuba nomthelela ekukhuphukeni kwentengo ka- petrol, u- diesel no- paraffin, okushaya wonke umuntu ephaketheni ngoba kusho ukukhuphuka kwentengo yempahla leli eliyithenga kwamanye amazwe nezidingo zempilo, ngisho nokudla esikuthenga ezitolo imbala.
Ukusimama kwerandi kubaluleke kakhulu emnothweni ngoba phela uwoyela osetshenziswa ukukhiqiza u- petrol, uthengwa emazweni aphesheya ngama- dollar.
Ngamafushane nje, uma irandi lisimama, liyehla inani lika- petrol, kanti uma ehla amandla erandi, iyenyuka intengo.
Lesi simo sibonakale kahle kuleli sonto lapho intengo ka- petrol ikhuphuke yaze yafika ngaphezu kuka-R16 ilitha okokuqala emlandweni wezwe, osekudale ukuba ezinye izinhlangano ziphakamise ukuba intela ekhokhwa uma kuthengwa u- petrol, imiswe wuhulumeni. Inkinga ngalesi siphakamiso wukuthi le ntela iyingxenye enkulu esetshenziswa wuhulumeni uma kwenziwa isabelomali sonyaka.
Ngaphandle nje kokuthi ingena esikhwameni sezingozi zemigwaqo, iRoad Accident Fund (RAF), ibuye ibe yingxenye yesabelomali sezwe, esisetshenziswa ukufeza izidingo zomphakathi, njengokukhokhela imfundo, ezempilo, izimpesheni zezaguga, ngisho nemali yeqolo imbala, ukubala izidingo ezimbalwa.
Uma uhulumeni ungamisa intela ka- petrol, kungasho ukuthi kufanele ukhuphule intela ekhokhwa yizisebenzi nezinkampani noma uboleke imali emabhange ukuze ukwazi ukufeza izidingo zomphakathi.
Ukwenza njalo, ngeke kwaba yindlela ephusile yokuphatha izwe, kunalokho kungacwilisa ezikweletini izwe elingeke lakwazi ukuzikhokha, sibe sibi kakhulu isimo somnotho.
Kufanele kwenziwe njani uma kunje? Ngeshwa, iNingizimu Afrika kayinawo uwoyela ezikhiqizela wona, kodwa iwuthenga kwamanye amazwe. Lokhu kusho ukuthi sisemseni wamanye amazwe.
Ikhambi lapha wukuba njengezwe siqhamuke namasu azokhulisa umnotho wezwe, okuzothi uma usimama, akhule namandla erandi uma liqhathaniswa nedollar lase-USA, okungaholela ekwehleni kwentengo ka- petrol nezinye izidingo zempilo esizithenga kwamanye amazwe.
Ngamafuphi, kufanele zonke izinhlaka ezithintekayo, okuwuhulumeni, osomabhizinisi nezinyunyana zezisebenzi, zibambisane ukuqhamuka namasu aphusile okusimamisa umnotho. Ngeke kwasisiza ukufuna ukuhamba ngezindlela ezinqamulelayo ukwenza lokhu, kodwa kuzodinga ukuba lezi zinhlaka zibhukule, zisebenze ngokuzikhandla isikhathi eside ukuze izwe liphumelele.