Sikhona isixazululo ngodaba lomdlali
MHLELI: Ayikho inkinga engenaso isixazululo. Zihlukene-ke nazo njalo izinkinga, kanjalo nezixazululo zakhona. Kuzona zonke kumele ube nesikhathi ozinika sona ukuphumela ngale usunqobile.
NePremier Soccer League (PSL) yaseNingizimu Afrika kumele iqhamuke neqhinga elinzulu elizokwenelisa izinhlangothi zonke - yona izincishe umoya - odabeni lukaTendai Ndoro ne-Ajax Cape Town. Kwelokuzincisha ngiqonde ukuthi ibuyele nganeno.
Indaba kaNdoro ize ifike kulolu dweshu ekulona nje, wubudedengu bayo njalo iPSL eyakhiphela umdlali ikhadi elimgunyaza ukuba adlale ngaphansi kwayo.
Ukuba wawenzeke ngendlela umsebenzi, yayingeke ibekhona yonke le nto yokugqigqa enkantolo kudluliswa amacala nezincomo zezinhlaka ezahlukene zezobulungiswa.
IDisciplinary Committee yePSL yadedela i-Ajax ukuba imdlalise uNdoro naphezu kokuba kwasekuvele imibiko eyayidalula ukuthi lo mdlali - odabuka eZimbabwe - isingeyesithathu kwisizini eyodwa ukuba asayine kuyona. Umgomo weFifa ephethe ibhola emhlabeni uyaphikisana nokuba umdlali adlalele amaqe- mbu amathathu ngesizini eyodwa, kodwa angabhalisa kuwona adlalele amabili kuphela. Sonke cishe siyazi okwalandela lapho, isincomo sokugcina sivune yona belu i-Ajax ukuba konke okwakuthathwe kuyona kubuyiselwe. Lokho kusho ukushintsha indlela ye- log yePSL okuyibuyisela kunombolo 15 i-Ajax - okuyibeka emidlalweni yokuhlungela ukungena kwi-Absa Premiership. Lokhu kuphazamisa iBlack Leopards engene kwi-Absa Premiership ngemidlalo yokuhlunga.
Izokwenziwa njani-ke manje le nto ukulungisa izinki- nga esezivele zikhona?
Nginombono nami la njengomthandi webhola lezinyawo. Ubaba u-Irvin Khoza nethimba lakhe eliholwa ngumama uMato Madlala, mabathenge iqembu elilodwa kulawa akhona ukuze kubuyele Ajax Cape Town njengomyalelo womehluleli uDenise Fischer, othole ukuthi yaphucwa aphuzu kungafanele.
Akekho ongazi ngezinkinga ezibhekene noMax Tshabalala ongumphathi weBloemfontein Celtic. Kuteleka abadlali ngenxa yokungatholi imivuzo yabo yanyanga zonke. IPSL mayikhokhele uMax imali thzeni njengengxenye yoku-khipha iqembu elilodwa ukuze kungene i-Ajax, ku-ngenjalo iwandise amaqe-mbu abe wu-18 noma abe wu-20. Inkinga iba sekutheni azotonyulwa ka-njani lawa amanye. Kukho konke abazokwenza - ngaphandle kwalokhu oku-ngenhla - kuzobe kuwukubambezela ukuqala kwesizini entsha ka-2018-19. ILeopards izokhala uma isinqumo siphikisana nayo, uma iPSL idlulisa icala kuhamba isikhathi. Soyicela ivuthiwe thina.