USONGELWA YINYANGA AYIKWELETAYO OWE-PSL
Ithi akasafuni ukuyikhokhela emuva kokumsiza
ISONGA ngokuphendula umlotha impilo ewubukhazikhazi ephilwa ngumdlali weAbsa Premiership ethi akasafuni ukuyikhokhela inyanga yaseNdumo, KwaMhlabuyalingana ngokumsiza izinto zakhe zikhanye kunobhutshuzwayo.
UMnu Magalobhe “Mkhulu” Cele, uthi usize uGoodman “Deco” Dlamini waKwaNongoma, ogijima kwiFree State Stars ngoZibandlela (December) nyakenye, bavumelana ngokukhokhelana u-R20 000, kodwa kuze kube manje lutho.
Utshele ILANGA ukuthi lo mdlali ufike kwakhe ehamba nomunye umlisa waseManguzi - ojwayele ukuthumela abadlali kule nyanga abasuke befuna ukuthandwa ngabaqeqeshi nabalandeli.
Ngokusho kukaMnu Cele, ngosuku afika ngalo lo mdlali, akakhulumanga lutho, bekuyilo mlisa ofake isicelo sokusetshenzwa ngemali encane, naye uMnu Cele athi uyamukelile. Emuva kwezinsukwana, lo mdlali ubuyele kwaCele esehamba yedwa eyobika zonke izinkinga ezimkhungethe.
“Ubuye eseyedwa wathi uzocela ukuba ngimsebenze kuhambe umqeqeshi okhona ngoba akamthandi, akafuni nokumdlalisa. Ukhale ngokuthi uzolahlekelwa yisinkwa futhi useyabona ukuthi uzoxoshwa kule kilabhu.
"Ngimnike ithemba, ngaqala ukumsebenza. Ucele ukuba ngimfakele nomuthi wokuqhulula amagoli, ngamnika. Emuva kwalokho uhambele phezulu ngoba ubelokhu ethola ukuba yiman of the match emidlalweni. Ngisamukele isicelo sakhe sokuba abuye angikhokhele.
"Besivumelene ngo-R20 000 manje ngifuna u-R30 000, kungenjalo ngizomphendula uphuya. Ngimtshelile ugobela (umuntu owamthwasisa) wami, okunguyena onginike igunya lokuba ngimvale lo mdlali, ngimphendule inhlekisa angabi yinto yalutho. Okwenze ngamtshela wukuthi umuthi wokugudluza umqeqeshi ngahamba naye lo mdlali sawula-nda kuye ugobela wami,” kusho uMnu Cele oveze ukuthi baningi abadlali abakhendla kuye futhi bamkhokhela kahle.
“Nginezinto eziningi engizikhombayo ngemali engiyinikezwa ngabadlali abagijima kwiNFD (National First Division) nakwi-Absa Premiership.
"Uma (lo mdlali) engafuni ukubuyisa le mali yami, uzolahlekelwa yikho konke anakho futhi mhla kulahleka, kuyoduma izwe lonke.
"Akimina engaqala ukubona ukuthi usephumelele kodwa nguyena owafika lapha kwami ethi ulethe umbiko wo-kuthi kuha-mba kahle konke ayekufisa. Waze washutha nezingane zami, kuyinjabulo yodwa lapha ekhaya.
"Sengikhulume kaningi nalona owamletha lapha ekhaya naye okhala ngokuthi nolwakhe ucingo luyazitshwa,” kusho le nyanga. ILANGA lixhumane nalona wesilisa waseManguzi ovumile ukuthi lesi silomo siyazi ngaye indlela eya kwaCele. “Ngifike ngamcelela (kuMnu Cele) njengoba sengiyaziwa ukuthi ngiyaye ngihambise abantu abakhokhayo.
"UMkhulu wangitshela ukuthi lo mdlali akasalubambi ucingo, ucela ngimfonele abuyise imali yakhe njengokwesivumelwano esenziwa esasetshenzwa. Ngizamile ukuxoxa naye ukuthi makakhokhe phela, kodwa elokhu ethembisa. Nolwami ucingo ubengasalubambi,” kusho lona wesilisa.
Ethintwa yiLANGA ngenyanga edlule uDeco, uvumile ukuthi ukhendle KwaMhlabuyalingana kodwa wathi uyadideka ukuthi yimuphi lo Cele ILANGA elikhuluma ngaye. Ngemuva kokuchazelwa kahle, uthe uzomfonela bayilungise le ndaba. “Ngesikhathi ngiya kuye ngangibuya kwabanye abantu ababedlale ngami, wangilungisela.
"Ngizomcela ukuba angayenzi le nto ayicabangayo, ngizomkhokhela imali yakhe,” kusho lo mdlali.
Emasontweni amabili adlule le nyanga ibuyile yaveza ukuthi namanje akazimisele ngokukhokha imali yayo. Esephinda ethintwa lo mdlali emuva kokuba le nyanga itshele ILANGA ukuthi namanje akakayikhokheli, akafunanga ukuphawula, uvele wavala ucingo.
UMnu Joseph Ndlazi ongumengameli weNgwe Idla Ngamabala Traditional Healers, eMkhanyakude, okuyinhlangano yabelaphi bendabuko uMnu Cele angaphansi kwayo, uthe kuyenzeka abelaphi bamvale umuntu ongafuni ukukhokha ebe esewuthathile umuthi wenyanga. Uthe kufanele inyanga imvale lowo muntu aphenduke into engelutho.
“Kawukho umuthi okufanele usebenzele omunye umuntu mahhala. Kangivumelani nokuba kukhishwe umphefumulo, kodwa kufanele (ongafuni ukukhokha) aphendulwe inhlekisa, uphuya ongenamsebenzi walutho,” kusho