Ubulale indodana wazilengisa esola umkhwekazi
Uthole ukuthi ingoduso imithiswe ngomunye
USHIYE iheheba lencwadi esola umkhwekazi wakhe owesilisa waseNanda obulale indodana yakhe qede wazilengisa emuva kokuthola ukuthi ingoduso yakhe - engunina wale ndodana yakhe - ikhuleliswe ngomunye umuntu.
ILANGA lithole ukuthi uMnu Ayanda Ngidi (32), usolwa ngokubulala indodana yakhe uSiphile Ngidi (6). Kuthiwa uMnu Ngidi ubeselobole waze wahambisa izibizo kubo kanina wengane yakhe oyisangoma. Kuthiwa ngaphambi kokuba azibulale, ushiye iheheba lencwadi esola ingoduso yakhe ngokudlala ngothando lwakhe.
Kuthiwa kule ncwadi akagcinanga ngokusola ingoduso, ukhale nangomkhwekazi wakhe ngokuba ngumzali oneziyalo ezingalungile endodakazini yakhe. Ngokuthola kweLANGA ngelungu lomndeni wakwaNgidi, elicele ukuba siligodle igama lalo, indaba iqale ngesikhathi ingoduso kaMnu Ngidi imtshela ukuthi ikhulelwe kodwa ingane kakusiyona eyakhe, ngeyelinye isoka.
“Sizamile siwumndeni ukuhlala phansi sikhulume naye u-Ayanda, kodwa kwanhlanga zimuka nomoya, ekhala ngokuthi uyamthanda unina wengane yakhe ngeke akwazi ukuphila ngaphandle kwakhe,” kusho ilungu lomndeni kamufi.
Kuthiwa abasekhweni lakhe bese bemncikisela nangokuthi abone indodana yakhe, sekuba wumzukuzuku uma kufanele ivakashe kubo. Leli lungu lomndeni lithi ngeSonto umufi uwutshelile umndeni wakhe ukuthi uzozibulala.
Kuthiwa ngoLwesibili bekumele aye emsebenzini, ezongena emini. Ucele indodana yakhe kunina wayo wathi uyoyithengela izimpahla zokugqoka, ngokusho kwaleli lungu lomndeni. Kuthiwa uqonde nayo ekamelweni lakhe wafika wayivulela opopayi kumabonakude qede wayivala ubuso ngoplastic yaze yashona.
Uqede lapho wabhodloza i- ceiling board wazilengisa. Kuthiwa eduze kwezidumbu zabo kutholakale incwadi ayibhalile, ebichaza ngokuzibulala kwakhe.
Kuthiwa kule ncwadi ubechaza ukuthi ubeyithanda kangakanani ingoduso yakhe. Leli lungu lomndeni lithi ngeke bamxolele unina wengane kamfowabo ngento abenze yona. Lithi umfowabo ubeyikhokhela esikoleni ingoduso yakhe, eyenzela konke ekufunayo, ethanda ngisho ingane yayo endala angayizali.
Ubesebenza kwaMasipala weTheku. “Le ntombazane kade yaqala ukuhlukumeza u-Ayanda. Ithole ingane yayo yokuqala ikade ithandana naye. Ngenxa yokuthi ubeyithanda, uyixolelile baqhubeka bathandana. Njengoba ikhulelwe, bekuzobe kungokwesibili ikhuleliswa ngomunye umuntu bethandana.
"Imzwisile ubuhlungu le ntombazane, ubengasadli, engasaligundi ikhanda nentshebe ehlale ezivalele yedwa ekamelweni lakhe,” kusho leli lungu.
Okhulumela amaphoyisa KwaZulu-Nata, uCapt Nqobile Gwala, uthe kuvulwe idokodo lophenyo necala lokubulala.
Bese kungokwesibili le ntombazane imithiswa ngomunye umuntu.