KUZOGQAMA EZESINTU KOWE-DUNDEE JULY
KUZOGQAMA okwesintu kwiDundee July ngempelasonto emuva kokuvela kwezindaba zokuthi kuhlelelwe "amabhinca" itende lawo ukuze ezogqamisa ingqephu yawo.
Lokhu kuzobe kwenzeka okokuqala ngqa njengoba umhleli walo mcimbi, uMnu Vuyani “Doh” Mabaso, ongowokudabuka eMsinga - kodwa osezinze eDundee - ethi kubalulekile ukuba kungalahleki okwesintu ukuze kukhuthazeke nesizukulwane samanje. Uthe leli tende kakulona elikamaskandi, kodwa ngelamabhinca athanda isintu.
“Kumele singakukhohlwa ukuthi lo mcimbi uqalwe ngabantu basemakhaya futhi usendaweni yasemakhaya, ngakho kumele siwamukele njengomcimbi wasemakhaya senze konke okuhambisana nokuba kwawo kule ndawo,” kusho uMnu Mabaso.
Uthi bekuyisifiso sakhe ukuthi njengoba iDundee July kuwumcimbi ohanjelwa yizivakashi ezahlukene, kuqhakanjiswe isintu kusuka ekudleni kuya komama abazohloba ngemvunulo nezicholo nezintombi ezizovunula bekho- mbisa ngesintu saKwaZulu, kanjalo nezinsizwa ezidume ngobubhinca.
“Kasigxilile kumaZulu kuphela, kodwa leli tende livuleleke kuzona zonke izinhlanga futhi nezihambeli zalo zamukelekile ukuba zihlobe nganoma yiyiphi imvunulo,” kusho yena. Kosaziwayo, uMnu Mabaso uthe balindele abalingisi abehlukene beSibaya, abeGenerations: The Legacy nabasakazi boKhozi FM kanti bazobe begabe ngomculo owehlukene wesintu.
Njengoba sekumi ngomumo kulungiselelwa lo mcimbi, asehlile namaphaphu ngemuva kokuba osomabhizinisi bendawo besabise ngokuwudunga uma izimfuno zabo zokuwuhlela zingalalelwa.
Kumanje wonke amalungiselelo ayaqhubeka eDundee Racecourse njengoba kugxunyekwa amatende nokunye.
Okhulumela uMnyango wezobuCiko namaSiko KwaZuluNatal, uMnu Mack Makhathini ukuqinisekisile ukuthi amalungiselelo ahamba kahle. “Lo mcimbi akusiwo owomjaho wamahhashi nengqephu kuphela, kodwa ngowokuthuthukiswa komnotho wendawo nokwakha amathuba emisebenzi,” kusho yena.