UTHOLE ISIBHAXU OBELINDELE UNEMENAYIDI
LIVULELWE icala lokushaya iphoyisa lasesiteshini samaphoyisa eNquthu, okubikwa ukuthi likhwelele ngenduku owesilisa ngenxa yokuthi ubefuna ukukhokhelwa ngonemenayithi ukuze alitholisele ngomakhalekhukhwini walo obulahlekile. Ngokuthola kweLA
uMnu Bheki Sibiya waseMachitshana, eBabanango, uvule icala lokushaywa emuva kokuba ethole umakhelekhukhwini wephoyisa elicele ukuba alitholisele.
Leli phoyisa kuthiwa limthembise ukumkhokhela imali okuthe uma sekumele lifeze isethembiso, lashaya phansi ngonyawo.
UMnu Sibiya uthi ngoMgqibelo odlule uthole iJ5 Samsung kanti uzofonelwa yilona leli phoyisa lathi licela alitholisele, wavuma. Uthi bahlelile ukuthi bazotholana kuphi nedolobha eNquthu.
“Iphoyisa lithe lizongiphathela u-R300 wedrinki ukuze lingibonge ngokulitholisela. Kuthe uma selifikile ngathi malilethe phela imali yami ukuze ngilinikeze ifoni yalo njengokwesivumelwano.
“Ngixakekile uma lingasavumi nemali ngathi ngiyagoloza nayo ifoni langikhahlela amankwahla, ladedela inqindi.
“Konke lokhu belikwenza lihamba nezinsizwa engingazazi ebezingawugqokile umfaniswano, engingenaso-ke isiqiniseko sokuthi nazo zisebenza kwabomthetho yini. Lezi zinsizwa nazo zigcine sezingishaya,” kusho uMnu Sibiya.
Okhulumela amaphoyisa KwaZulu-Natal, uCapt Nqobile Gwala, uqinisekisile ukuthi udaba lusezandleni zamaphoyisa ayaluphenya. Uthi kuvulwe icala lokushaya wangacacisa ukuthi kwenzakalani ngomsolwa.