INGASE IPHINDE YENYUKE INTENGO
KUKHALWA kulo lonke izwe ngesimemezelo somnyango wezamandla sokuthi intengo kaphethiloli nodizili ingase yenyuke ngenyanga ezayo.
Ngokwezilinganiso zesikhwama sikahulumeni sezamandla, iCentral Energy Fund, intengo izokwenyuka ngo-29c ilitha kuphethiloli owaziwa nge- unleaded, udizili ungase unyuke ngo-14c ilitha, uphalafini kube wu-31c ilitha kuthi i- gas yenyuke ngo-58c i- kilogram.
Ngokwencazelo yalo mnyango, izinguquko zamanani entengo kawoyela ongahluziwe, ukwehla kwamandla erandi uma liqhathaniswa nedola lase-USA, yikho okube nomthelela kulokhu kuqagulwa kokwenyuka kwentengo kaphethiloli nodizili.
“Kulesi sikhathi okubuyekezwa ngaso intengo kaphethiloli, kube nokwenyuka kwentengo kawoyela oluhlaza okufinyelele ezingeni eliphezulu kusukela ngoMandulo (September) ngonyaka odlule," kusho uMnu Johannes Mokobane okhulumela umnyango wezamandla.
I-Automobile Association yona inezayo izilinganiso ngomhlahlo wayo wokwenyuka kwentengo kadizili, uphethiloli nophalafini, ezithi uphethiloli ungase wenyuke ngo-19c ilitha, udizili wenyuke ngo-13c ilitha kuthi uphalafini wenyuke ngo-22c.
Njengoba isingenile imibiko ngalolu daba oseluthanda ukwenyusa imimoya kwabaningi, ILANGA lithinte ungoti kwezomnotho uSolwazi Bonke Dumisa ukuzwa uvo lwakhe ngalo.
Uthe ubona ukuthi izingqapheli zakwa-Automobile Association (AA) nakuba ezihlonipha ngesipiliyoni sazo ekuhlaziyeni isimo, kungathi kulokhu zibe namatata ngokusheshe zishaye umhlahlo.
Uthe ngokuvamile usuku olukahle kuba wumhla ka-26 enyangeni lapho isithombe sesicacile ngokwenzekayo nokuba nomthelela emananini kawoyela.
Abakwa-Automobile Association bathi bakholwa wukuthi leli yithuba lokuba uhulumeni uke uyicubungule kahle indaba yentela kaphethiloli ( fuel levies) ngoba lokhu kuyizindleko ongaba nawo amandla okuzilawula.
Uma uphethiloli wenyukile ngoNcwaba, kuyobe kusho ukuthi usuwenyuka cishe okuka-6 izinyanga zilandelana.