ITHEMBA NGOBUMBANO
KUZOQINISA ithemba ngobumbano olukhuthazwa nguMengameli we-African National Congress (ANC) neNingizimu Afrika, uMnu Cyril Ramaphosa, ukuhlala ngempumelelo kwengqungquthela yokukhetha ubuholi beANC KwaZulu-Natal.
Le ngqunguthela ebhuntshe ngemizuzu yokugcina ngenyanga eyedlule e-University of Zululand, KwaDlangezwa, eMpangeni, iyaqala namhlanje ngoLwesine eDurban University of Technology (DUT).
Ngokusho komhlaziyi ozimele, uMnu Protas Madlala, sekuntwela ezansi ngobumbano kuleli qembu inqobo nje uma le ngqungquthela izoba nokuthula.
“Kuyajabulisa ukuzwa ukuthi sebekudlulisile abebengaboni ngasolinye ngakho, basayina nesivumelwano. Lokhu kuhle ngoba lolu bumbano uMnu Ramaphosa alugqugquzelayo, seluzoba yinto yangempela,” kusho uMnu Madlala.
Uthi bekuzoba kubi uma besilokhu siqhubeka isikhathi le ngqungquthela ingahlangene. “IKwaZulu-Natal iyaziwa ngezigameko ezinesihluku zokubulawa kosopolitiki ikakhulukazi uma sekusondela ukhetho, ngakho ukusheshe kukhethwe ubuholi kuzokwenza abaholi bakwazi ukukhuluma into ezwakalayo emalungwini," kusho uMnu Madlala.
Kuzokhumbuleka ukuthi engqungutheleni edlule iningi lamalungu abeyihambele eBhekuzulu kwaDlangezwa, agcine esehhahhameza uMnu Gwede Mantashe ongusihlalo we-ANC, waphoqeleka ukungayethuli inkulumo yakhe.
Igcine ibhuntsha ngomzuzu wokugcina ngemuva kokuba iqeqebana ebelingagculisekile ngokuhlala kwayo libabele enkantolo ukuze ingaqali kwakuqala.
Kuzokhumbuleka ukuthi uNkk Jessie Duarte ucashunwe emithonjeni eyahlukene yabezindaba ekucacisa ukuthi konke sekumi ngomumo ngokuhlala kwengqungquthela namhlanje.
Kule ngqungquthela uMnu Sihle Zikalala uthwelwe ngeqoma esikhundleni sokuba ngusihlalo we-ANC kulesi sifundazwe.
Khona manjalo izibalo zakamuva ezenziwe yinkampani yocwaningo, i-Ipsos ziveze ukuthi i-ANC ihamba phambili ngo-60% ngokwesekwa eNingizimu Afika ngaphansi kukaMnu Ramaphosa.