INGQAYIZIVELE YETHUBA KWIMBOKODO NENTSHA
LIHLWAYA intsha nabesifazane abasemkhakheni wezokwakha abazongena ohlelweni lokuthuthukiswa kwamabhizinisi i-Ithala Development Finance Corporation (IDFC).
Isikhulu esiphezulu esibambile kwi-Ithala, uNkk Farhana Abdool-Kader, sithe: “Njengoba kuvuselelwa izakhiwo zethu enyakatho yeKwaZulu-Natal - sicuphe ngezinye izinhlelo zokuphucula izakhiwo - sifisa ukusiza amabhizinisi awu-60 abantu abamnyama, ukuze ezokwaziwa, agunyazwe ukungena ohlwini lwethu.
“Sibheka amabhizinisi awu-30 entsha nawabantu besifazane awu-30.” Njengengqalabutho yentuthuko yamabhizinisi asemalokishini nasemakhaya, abe-Ithala bathi bayabazi ubumqoka bokuthuthukisa ingqalasizinda ukuze kunciphe ububha futhi kufukulwe nomnotho.
“Siyisikhungo sikahulumeni, siyasabela uma uhulumeni uhlaba ikhwelo lokuthuthukisa umnotho nokufukula abantu besifundazwe sakithi. Ngonyaka odlule sisebenzise uR-47,25 million ukuvuselela izakhiwo zethu ezindala KwaZuluNatal kanti le mali isize amabhizinisi abamnyama bendawo,” kuqhuba uNkk Abdool-Kader.
“Le misebenzi - okubalwa kuyo owokufaka ugesi, amapayipi amanzi, wukulungisa uphahla, wukupenda nokubiya - yenziwe emabhizinisini awu-12, iningi lawo okungawabantu abamnyama, okusho ukuthi kudaleke amathuba emisebenzi awu-302.
“Sikholwa wukuthi kuningi ebesingakwenza, ikakhulu ngasohlangothini lokwakha,” kusho yena.
Oyedwa kwabafaka isicelo kufanele abe ngumqondisi obhalisiwe, umnikazi noma umlingani enkampanini yezokwakha bese ebhala incwadi esho ukuthi kungani efisa ukungena kulolu hlelo.
Okunye okudingekayo wukuthi abe ngowaKwaZulu-Natal, abe nesitifiketi seBEE noma esifungelwe esifakaza ukuthi yibhizinisi lomuntu omusha noma wesifazane omnyama.
Inkampani yakhe makube ngesineminyaka emithathu ikhona, ebhalisiwe kwiCentral Supplier Database futhi iqashe abantu okungenani abawu-5. Kufanele ibhaliswe kwiConstruction Industry Registration Board, ibe negrading ka-1 kuya ku-3 (kule mikhakha: owokhwakha, owokufaka amanzi, owezitamkoko namapayipi amanzi, owamagceke, owokunisela, owokutshala, okagesi wezakhiwo). Ngemibuzo, kungathunyelwa i- e-mail ku: supplierdevelopment@ithala.co.za