Indida kulahleka isiguli esibhedlela
Bathi nabo kabazi ukuthi kwenzeke kanjani
UYAVEVA yintukuthelo owesifazane waseMatabetulu, eNanda, eThekwini okulahleke indodana yakhe kade ilaliswe esibhedlela iMahatma Gandhi Memorial, ePhoenix. UNkz Deliwe Mchunu uthi ufuna incazelo ngokulahleka kukaNtuthuko Mchunu (22), osekuphele amasonto amabili engatholakali.
Utshele leli phephandaba ukuthi indodana yakhe ingeniswe ngoNhlangulana (June) kulesi sibhedlela kade iphanjanelwa yingqondo. Kuphele isonto ilalisiwe, emuva kwalokho wathola ucingo kulesi sibhedlela etshelwa ukuthi ilahlekile.
Uthi ufuna umnyango wezempilo uthathele isibhedlela izinyathelo ngoba lokhu kukhomba ngokusobala ukuthi kunobudedengu esibenzile. Utshele ILANGA ukuthi akazi nokuthi uzophuma abhekephi uma ebheka indodana yakhe.
“Indodana yami ngiyilande emakhaya yazohlala nami lapha ngoba ibingaphathekile kahle empilweni. Isifikile lapha, iqiniswe wukugula yaphanjanelwa yikhanda, ngagcina ngiphoqeleka ukuyiphuthumisa esibhedlela.
“Ilalisiwe kulesi sibhedlela nami ngilokhu ngiya ngiyoyibheka ukuthi iqhuba kanjani. Kuthe kusaphele isonto ilalisiwe, ngathola ucingo ngitshelwa ukuthi ilahlekile. Ngiqale ngangakholwa, kangangoba ngize ngaziyela esibhedlela ngifuna bangichazele ukuthi kwenzekeni.
“Bangitshele ukuthi nabo kabazi ukuthi kwenzeke kanjani kodwa kabayibonanga. Ngiye emaphoyiseni akhona ePhoenix kodwa angangivulela icala ngoba ethi kumele kuphele isikhathi esithize elahlekile.
“Ngigcine ngilivula eMtshebheni icala lokulahleka kwendodana yami. Kudlule usuku ngathola ucingo emaphoyiseni asePhoenix engazisa ukuthi idokodo selikuwona, angitshela ukuthi ayile esibhedlela,” kusho uNkz Mchunu.
Uthi okumethusile wukuthi abasesibhedlela batshele amaphoyisa ukuthi indodana yakhe ikhishiwe esibhedlela kodwa behluleka wukuveza lapho kusayinwe khona ukuthi iphumile.
“Amaphoyisa agcine ekhulume nomphathi waso isibhedlela oqinisekisile kuwona ukuthi indodana yami ilahlekile, kayikhishwanga. Kuyacaca ukuthi ukuba kangisukumanga, esibhedlela bebezokwenza sengathi indodana yami ikhishiwe,” kusho yena.
Okhulumela uMnyango wezeMpilo KwaZulu-Natal, uNkz Ncumisa Mafunda, uthe: “Umnyango ukhathazekile ngalolu daba futhi selubikiwe emaphoyiseni.” Okhulumela amaphoyisa KwaZuluNatal, uCapt Nqobile Gwala, uthe lubikiwe emaphoyiseni udaba lokulahleka kukaMnu Mchunu.