Imiswe nge- sms imenenja kamasipala
Isolwa yizikhulu zikamasipala odabeni lwezimali
ISONGA ngokuthathela uMasipala waseJozini izinyathelo zomthetho imenenja yawo emiswe ngomqhafazo esikhundleni ngezinsolo zokuthinteka enkohlakalweni okuthwa idla lubi kulo masipala.
UMnu Kuhlekonke Khumalo uthole umyalezo kamakhalekhukhwini ovela kwiMeya yaseJozini, uMnu Delani Mabika, umtshela ukuthi amakhansela asenqume ukuba amiswe. Lesi sinqumo kuthiwa sithathwe ngoMsombuluko ebusuku emhlanganweni obukwelinye lamahhotela aseJozini.
Umthombo ongaphakathi kulo masipala, uveze ukuthi ngemuva kwalesi sinqumo, kube nomkikizo, kwakhala namakhwela, obekwenziwa ngamakhansela e-Inkatha Freedom Party (IFP) ebambisene nelilodwa le-African National Congress (ANC) nele-Economic Freedom Fighters (EFF).
Phakathi kwezinsolo ezibhekene noMnu Khumalo, kubalwa ukuxhashazwa kwemali kamasipala, kuqashwa izindawo zokwenza imihlangano yamakhansela emahhotela aseduze nomasipala njengoba sekuphele unyaka wonke kungaphothuliwe ukwakhiwa kwamahhovisi awo okukhishwe ithenda yokuba akhiwe kabusha.
Le thenda inikezwe inkampani yaseMpangeni, iSele & Musa Trading CC okubikwa ukuthi uMnu Khumalo unqume ukuba ikhokhelwe yonke imali eyibizile kanti izovelelwa yishwa idliwe ngabaqoqi bentela, iSouth African Revenue Service (Sars) njengoba kuthiwa ibikweleta ingasayikhokhi intela.
Phakathi kwezakhiwo ezibalwa nalesi, yihholo lomphakathi waseNgonyameni okumenyezelwe ukuthi lizokwakhiwa ngo-R6 million kodwa eligcine lisale kanjalo ngemuva kokuba iSele & Musa Trading CC ingakwazanga ukwenza umsebenzi.
Kubalwa nesigameko sakwaward 17 lapho kubikwa ukuthi kuqashwe i- grader, kwabekwa ama- container, kwabiywa, emuva kwalokho uMnu Khumalo wagunyaza ukuba kukhokhwe u-R2 million.
Kukhona no-R11 million okuthiwa usentshenziswe ukulungisa umgwaqo oyikhilomitha osedolobheni laseMkhuze. Udaba lwalo mgwaqo lususe omkhulu umsindo kulo masipala.
Ekhuluma neLANGA uMnu Khumalo, uthe ukubona kuphambene nomthetho ukumiswa kwakhe ngoba sekuzoqalwa uphenyo. “Ngithole umyalezo ovela kubaba uMabika oyimeya, engazisa ngokuthi kangisavumelekile ukuba semagcekeni kamasipala ngoba kuzoqalwa uphenyo oluyisipesheli.
"Ngingakusho nje ngingananazi ukuthi ngizophoqeleka ukuwufaka enkantolo umasipala ngoba ngibona kuwukuhlukumeza ilungelo lami ukuba ngimiswe ngingazelele. Akukho lapho ngike ngabizwa khona kwathiwa mangichaze ngokusebenza kwemali kulo masipala.
"Ngemuva kokuba ngithole umyalezo wemeya, ngiyifonele yangitshela ukuthi lesi isinqumo sithathwe emhlanganweni obusebusuku.
"Selokhu ngafika kakukaze nangolulodwa usuku lo masipala ubenomhlangano ebusuku kodwa ngoba bekuyokhishwa mina, ube sebusuku. Ngizosiphonsela inselelo isinqumo salo masipala,” kusho uMnu Khumalo.
Ukumiswa kwakhe kuqinisekiswe nguNkk Lindiwe Gumbi, ongusomlomo kulo masipala. Uveze ukuthi iningi imali echithwe yilo masipala uqasha izindawo zokwenza imihlangano yamakhansela.
Uveze nokuthi kunyamalale nemali yohlelo lukaxoshindlala olwakhelwe ukubhekana namaprojekthi amancane kuwona wonke ama-ward alo masipala.
“Ngifisa kucace kahle ukuthi uKhumalo akaxoshiwe, kodwa unxuswe ukuba ayophumula ekhaya njengoba kuzoqalwa uphenyo oluzothatha izinyanga ezintathu, okuyilona oluzocacisa ukuthi uyathinteka noma cha,” kusho uNkk Gumbi.
Leli phephandaba lizame kaningi ukuxhumana neMeya yaseJozini, uMnu Mabika, kodwa kwangalunga. Ucingo lwayo belukhala lungabanjwa.
Okulandele lapho kube wukuthi lungabe lusatholakala emoyeni, seluvaliwe.