Ukubaluleka kokuhlelela impesheni
NGABE uhlela ukuthatha umhlalaphansi? Nakhu okusemqoka okumele ukucabange ukuze impesheni yakho ikusebenzele futhi ikunike lokhu okudingayo. Ukuhlela ngendlela elungileyo kusemqoka kakhulu ukuze ungene empeshenini ezokulondoloza ngokwezidingo zakho.
Ngabe unalo uhlelo lwezemali? Isinyathelo sokuqala sohlelo lwezemali siqala ngokuqondisisa izidingo zakho ngokuthi ufuna impesheni yakho ikusebenzele kanjani uma usuthatha umhlalaphansi.
Uhlelo lwezemali lusebenza njengomhlahlandlela wokufezekisa amaphupho akho owahlelele uma usuya empeshenini. Lokhu kungaba wuhlelo lwesikhashana ngokwemali ozoyidinga uma ususempeshenini, wukuhlelela intela nokuhlela ukuthi umnotho wakho uzowukhulisa kanjani ukuze udluliselwe ezizukulwaneni ohlele ukuba zihlomule.
Unganquma ukuya empeshenini ngaphambi kokuqeda ukukhokhela zonke izikweletu zakho; ezifana nesomuzi, imali ebolekiwe noma izikweletu zasezitolo. Ngaphezulu kwalokho, ungase ube nezingane noma abazukulu abasadinga ukwesekwa nguwena ngokwemali. Kumele uqondisise umthelela walokhu, uphinde ube nohlelo lokukhokha zonke izikweletu onazo uphinde ukwazi ukuqhubeka nokweseka izingane zakho ngokwemali.
Uzodinga malini uma usuthathe umhlalaphansi? Lona wumbuzo ojwayelekile ukubuzwa ngabahleli bezemali. Abahleli bezemali bangakwazi ukukweluleka ngemali ozoyidinga uma uthatha umhlalaphansi noma bakubonise ukuthi ungafinyelela kanjani ekuthatheni umhlalaphansi ozokulondoloza isikhathi eside.
Bakholwa wukuthi izinhlelo ziyehluka kumuntu nomuntu ngoba imali eyanele ukuthatha umhlalaphansi kumuntu ngamunye ilele ekutheni ufuna ukwenzani uma esethathe impesheni. Noma ngabe zithini izinhlelo zakho zokuthatha umhlalaphansi, kuwumqondo omuhle ukuba ubonisane nomeluleki wezemali bese nivumelana ngohlelo oluzofeza izifiso zakho. Lokhu kuholela ekubeni ube nesithombe esicacile ngempeshenini yakho.
Yiziphi izinhlelo ezikulungele uma usuthathe umhlalaphansi? Uma uthatha impesheni ungaphansi kohlelo lwe- retirement fund, okuyisikhwama sempesheni, uvumelekile ukuthatha ingxenye yemali ibe wukheshi. Enye ingxenye ungathenga uhlelo olubizwa ngeannuity.
Lolu hlelo lwakhelwe ukuba ukwazi ukuthola imali noma inzuzo kulesi samba othenge ngaso i- annuity. Ungakhetha ohlelweni olubizwa nge- guaranteed annuity noma i- living annuity.
Ngesonto elizayo sizonikezela ngemininingwane ngalezi zinhlelo. Ukukhetha phakathi kwalezi zinhlelo kulele kulezi zinto ezilandelayo:
Ngabe ufuna uhlelo oluzovumelana nesimo sakho?
Ngabe ufuna ukuthola imali engakanani?
Ngabe ufuna ukushiya imali kulaba obabhale ohlwini lwabazohlomula?
Ngabe usenabantwana nabazukulu abasadinga ukunakekelwa nguwe? Uma usenabantwana abasancike kuwena ukwesekwa ngokwemali, kuzomele uhlele futhi uqonde ukuthi kuzomele ulondoloze imali yokuthatha umhlalaphansi neyemfundo.
Ukhumbule ukuthi zikhona izindlela nezinhlelo ezizokusiza ukulondolozela ukuthatha umhlalaphansi nemali yezemfundo. Umeluleki wezemali angakwazi ukwakha indlela yokukwenza lokhu emuva kokuhlolisisa isimo sakho sempilo nesemali ukuze uhlelo luhambelane nezifiso zakho uma usuthatha impesheni.
Ngabe ukuhlelele ukwenyuka kwentengo yemikhiqizo nezinsiza uma usuthathe umhlalaphansi? Ngabe unolwazi ngentengo yokudla, umshwalense wezempilo, imali yokufundisa izingane zakho uma usuthathe impesheni? Ngabe ulondoloze imali eyanele elingana nezinga lempilo oyiphilayo uma usuthathe umhlalaphansi?
Ukwenyuka kwentengo yemikhiqizo nezinsiza kunomthelela uma kuhlelelwa umhlalaphansi. UNkz Zungu uyi-Manager kwi-Inkunzi Wealth Group. Ungamthinta ku: 087 160 0018, noma kwi-e-mail ethi: invest@iwgsa.co.za.