BAVIMBE UKUVULWA KWESIKOLE NGOKUSHISA AMATHAYI ABAZALI
BAVALE amasango esikole abazali babafundi baseMalahleni Primary School, eMnambithi, izolo ngoLwesithathu emuva kokuba kuvulwe izikole ngoLwesibili bafica lesi sikole singalungisiwe njengokwesethembiso.
Lesi sikole sikhahlanyezwe yisiphepho mhla ka-25 kuMasingana (January) nonyaka. Kubikwa ukuthi ngaphambi kokuba kuvalwe izikole ngoNhlangulana (June), isigungu esilawula isikole sibenomhlangano nabazali okuvele kuwona ukuthi kumele uma kuvulwa izikole isikole sibe sesilungisiwe.
Izolo abazali kuthiwa bavuke umbhejazana bashisa amathayi phambi kwesango lesikole ngoba befuna kungangeni muntu ngaphakathi kuze kuzwakale izikhalo zabo. Umzali ocele ukuba igama lakhe lingadalulwa, utshele ILANGA ukuthi bakhathazekile ngokungalungiswa kwalesi sikole.
Uthi ngoLwesibili baphoqeleke ukuba balande izingane zabo esikoleni ngenxa yamakhaza. Utshele ILANGA ukuthi namhlanje ngoLwesine kuzovalwa imigwaqo kungahambi lutho ukuze kuzophazamiseka ukufunda nasezikoleni ezingomakhelwane.
“Kasazi ukuthi kuzothatha isikhathi esingakanani ukuba isikole silungiswe njengoba izingane zethu zihleli emakhaya zingafundi. Singakujabulela ukuba kulethwe amagumbi angomahamba-nendlwana ukuze izingane zethu zifunde ngoba sengathi kuzothatha kude ukuba isikole silungiswe.
“Kuke kwaphoqeleka ukuba abafundi bafundele emnyango ngenxa yale nkinga,” kusho lo mzali. Usihlalo wesigungu esilawula isikole, uMnu Thulani Kheswa, uthe kuyiqiniso ukuthi abazali bavale isikole.
Utshele ILANGA ukuthi umnyango wezemfundo ubikeliwe ngodaba lwalesi sikole. Uthe kunabantu abayile ukuyobheka umonakalo wesikole emuva kokukhahlamezeka kwaso, bathe kuzodinga u-R 2.2 million ukuze silungiswe.
“Sesikhuluma iqiniso, akekho umzali ongavumela ukuba ingane yakhe ifundele esikoleni esifana nalesi,” kusho uMnu Kheswa.
Okhulumela uMnyango wezeMfundo KwaZulu-Natal, uMnu Muzi Mahlambi, uthe: “Umnyango uyalwazi lolu daba, lusasetshenzwa. Ziningi izikole ezikhahlamezekile ngenxa yesiphepho kanti ukuba amandla ayavuma, ngabe sekuhanjiswe namagumbi angomahamba-nendlwana.
“Ukuthi usizo kalukakafiki eMalahleni, lokho kakusho ukuthi bazitshiwe, udaba lwakhona luyaziwa. Sicela ukuba umphakathi ubekezele, umnyango uzothumela abesifunda sezemfundo kule ndawo ukuba bayochazela umphakathi ukuthi kwenzekani mayelana nodaba lwesikole,” kusho uMnu Mahlambi.