Uyesatshiswa u- principal obambile e-Okumhlomphe
Isikole sesigadwe ngamaphoyisa
UMBANGO wesikhundla sikathishanhloko oshisa phansi e-Okumhlophe High School, sewenze uthishanhloko walesi sikole obambile, uMnu Hlanganani Zwane, wabhalela umnyango wacela ukushintshelwa kwesinye isikole ngenxa yokudliwa yingebhe.
Kulesi sikole akufundwanga ngoLwesibili kwazise abazali abebedinwe begane unwabu bavale isikole bethi ngeke kufundwe kuze kube kuqashwa uthishanhloko.
Bathi kasikho isidingo sokuba abambe lesi sikhundla uMnu Zwane ngoba kade yenziwa inhlolokhono yokuqashwa kukathishanhloko omusha futhi bamphasisa kodwa namanje umnyango kawufuni ukumqasha.
UNkk Gugu Zwane oyinkosikazi kaMnu Zwane, uthi useyalele umyeni wakhe ukuba abhale incwadi yokuba ashintshelwe kwesinye isikole ngoba sebeyesaba uma ephuma ekhaya eya emse- benzini njengoba sekukhona nabamsabisayo.
“Izolo kulaba bazali abebevale lesi sikole, kukhona nabebemsabisa ngokuthi bazoshisa ngisho imoto yakhe naye bambulale. Siwumndeni sinqume ukuba acele ukushiya kulesi sikole kunokuba aze afe.
“Ngeke sivume ukulahlekelwa nguyena njengoba nezingane zisencane kanje. Sengike ngangeniswa nasesibhedlela ngenxa yengcindezi yengqondo ngenxa yalesi simo,” kusho uNkk Zwane.
Uthi izolo ngoLwesithathu ubiziwe uMnu Zwane wumnyango wathi makaye esikoleni, akazi noma besebeyomnika impendulo ngesicelo sakhe yini.
Ethintwa uMnu Zwane, wenqabile ukuphawula ethi yena uyisisebenzi somnyango wezemfundo, ngeke aphawule lutho kwabezindaba ngoba umnyango unomkhulumeli wawo.
Abazali bathi basazoqhubeka nombhikisho wabo kuze kube umnyango uyabalalela. Omunye wabazali, uNkk Dudu Luthuli, uthi lesi sikole njengoba singenaye nje uthishanhloko siyaqhubeka siyafa siyaphela.
“Singabazali ngeke sikuvumele ukubulawa kwalesi sikole ngoba lokhu kuzokhinyabeza, kubulale imfundo yezingane zethu. Kasifuni ukukhipha izingane zethu kulesi sikole siyozifaka kwezinye kodwa sithi makulungiswe lesi, abantwana bethu baqhubeke nokuthola imfundo engcono,” kusho uNkk Luthuli.
Okhulumela uMnyango wezeMfundo KwaZulu-Natal, uMnu Kwazi Mthethwa, uthe udaba lwase-Okumhlophe lusalungiswa, balindele umbiko ngalo. Uthe abazali bayayazi indlela okumele bayilandele uma benganelisekile ngokuthile, hhayi ukuvala isikole.
“Akekho ongazi ukuthi izindaba zokuqashwa kwezisebenzi zibhekelelwe wuphiko lwakwandabazabantu. Uma kukhona abakhala ngakho, kufanele babhalele lolu phiko bangancishi izingane ithuba lokufunda ngoba lokhu kuphambene nomthetho,” kusho uMnu Mthethwa.