Umuntu ngamunye makazifukule kanye nezwe
KULE nyanga lapho kunemicimbi ezweni lonke naphesheya kwezilwandle imbala, yokugubha iminyaka ewu-100 yosuku lokuzalwa kukamengameli wokuqala kahulumeni wentando yeningi eNingizimu Afrika, uMnu Nelson Rolihlahla Mandela, kubalulekile ukuba umuntu ngamunye azibuze ukuthi yini ayenzayo noma angayenza ukuzithuthukisa yena nezwe lethu esaliphiwa nguMdali.
Ngo-1960, umengameli wase-United States of America (USA), uMnu John Fitzgerald Kennedy, ethula inkulumo yakhe emuva kokugcotshwa ukuba ngumengameli, washo amazwi asankeneneza namanje kwabanye bethu.
Waphonsela amaMelikana inselelo ukuba angabheki kuphela ukuthi uhulumeni uwenzelani, kodwa azibuze ukuthi yini angayenzela izwe lawo (Ask not what your country can do for you, ask what you can do for your country). Kulesi sikhathi lapho izwe lethu ligajwe yizinkinga eziningi, esingabala kuzona ukwesweleka kwemisebenzi, ububha, inkohlakalo, nobugebengu, la mazwi kaMnu Kennedy abaluleke kakhulu.
Kunegciwane eliyingozi elihlasele ezweni, lapho abanye bethu bangayingeni eyokuzikhandla ukuze bathole lokho abakuphokophelele, kunalokho bakhonze ukukhangeza kuhulumeni ukuze baphiwe.
Lesi sihlava sande kakhulu emuva kokufika kukahulumeni wentando yeningi, lapho amaqembu ezombusazwe, ikakhulukazi elibusayo i-ANC, ethembisa abantu izulu nomhlaba ngesikhathi enxenxa amavoti.
Lokhu kulandelwe wukwakhiwa kwezindlu zomxhaso ezweni lonke, kwalandela nokukhula ngesivinini kwemali ekhishwa wuhulumeni yezibonelelo zezingane (abanye bethu abayibiza ngemali yeqolo).
Ngeshwa lezi zibonelelo sezakhe umbono wokuthi uhulumeni kufanele wenzele abantu yonke into, bona bengabe besazenzela izinto ukuziphilisa nokuzithuthukisa.
Ubuvila budlangile ezweni, ngisho nezinye zezingane zesikole kazisazimisele ngokusebenza kanzima ezikoleni ukuze ziphumelele.
Ukuze ukhulise isibalo sabaphumelelayo kumatikuletsheni, uhulumeni sewenze ukuphasa kwabalula ngokwenza imaki lokuphumelela libe ngaphansi kuka-50% engxenyeni yezifundo.
Okwenzekayo eNingizimu Afrika kakulakhi izwe eliphumelelayo nezakhamizi eziziqhenyayo ngokuphumelela nokwenza izinto zenzeke.
Ukuhlonipha uMnu Mandela kungakuhle uma singagcini ngokwenza imicimbi ngosuku lwakhe lokuzalwa, umhla ka-18 kuNtulikazi (July) nje kuphela.
Okubalulekile wukuba sizibophezele kabusha ukuthi sizosebenza kanzima ukuzithuthukisa, ukusiza omakhelwane bethu, imiphakathi yakithi nezwe lethu uqobo.
Kufanele kuphele ukuba sibheke ukwenzelwa yonke into wuhulumeni.
Ukufunda ukuzenzela kuyobeka leli lizwe ezingeni eliphezulu, kwenze sibe yizwe eliphumelelayo nelihlonishwa ngamanye amazwe.