Umlando nge-Adams
MHLELI: Igama elithi Adams Mission laqanjwa yisigungu samamishinari ngo1851 ngoba kuhlonishwa uDkt Newton Adams, igama okuyilona lona lale ndawo yiManzimtoti, lapho kugeleza khona umfula omkhulu owaziwa ngaleli gama.
Kwathi uma kufika yena uDkt Adams - efikela esizweni sakwaMaphumulo - kwabe sekubizwa nge-Amanzimtoti Mission Reserve indawo eyisabelo somphakathi wamakholwa ngokukahulumeni wamakoloni. Ngokuhamba kwesikhathi, ubukhosi basingathwa ngabesizwe sakwaMakhanya ngoba kwase kuyibo abaningi futhi abasebemukele nokholo lwasentshonalanga.
IManzimtoti noma i-Adams Mission, ingenye yezindawo ezaziwa njengezononhlevu nezingwevu ezivuthiwe ebuchosheni. Isizukulwane samanje yiso okumele sithathe igxathu eliya phambili ekuthuthukiseni nasekubuyiseni isithunzi seManzimtoti Mission Reserve. Umlando namagugu esizwe uyisisekelo sempilo yomphakathi futhi yiwo umkhombandlela wokuthi isizukulwane esilandelayo sifisa siphile kanjani.
Ucwaningo engilwenzile esikhathini esingangonyaka nge-Adams Mission - njengoba isiyaziwa kanjalo - luveza ngokusobala indlela umphakathi owawuhleleke ngayo, nowawulawulwa ngakhona ekuziphatheni. Kunabanumzane namakhosikazi ababebambe iqhaza elikhulu ekuhlaleni komphakathi ukuthi kube nokuthula nokuphepha.
Ngithe ngihambahamba emgwaqweni khona lapha ngakithi e-Adams Mission, ngixoxa namalungu athile omphakathi - ngifuna nje ukuthola imibono yawo njengoba sifisa ukuqamba amagama emigwaqo lena emincanyana engena phakathi kwemizi ngoba kuba nzima uma izakhamizi zidinga usizo lwezimo eziphuthumayo njengolwamaphoyisa, izicishamlilo, izithuthi zabagulayo noma-ke nje ukulethelwa impahla enjengefenisha uma umuntu eyithenge esitolo - ngithole ukuthi kunzima ngoba kumele ulokhu uchaza uxhumana nalowo muntu umyalela ukuthi uzojika kuphi.
Ukuba khona kwamagama emigwaqo kusiza ekutheni kube lula ukuthola indawo umuntu ayifunayo. Ngisho nezivakashi ezisuka kude ziyaduka, zithwale kanzima ukuthola imizi yalapho zivakashele khona. Amalungu asanda kufika e-Adams Mission, kuthe uma ngixoxa nawo aveza ukuthi wona angathanda ukuba le migwaqwana engena phakathi kwemizi iqanjwe ngamalungu amadala akule ndawo. Ucwaningo esilwenzile nabanye basebukhosini obakebaba khona kuseyi
Amanzimtoti Mission Reserve, kuvela amagama abantu abangamalungu omphakathi aqavile ngokungahlali dekle phansi, kepha abayingxenye yokulawula uzinzo emphakathini.
Amagama anjengawoChief Msayithethe Maphumulo, uChief Mbulawa Phewa, induna Ngedwa Njapha, uChief Mancinci Maphumulo, iNkosi Mashimane Maphumulo, uChief Dabulesakhe Makhanya, uMnu Nkonka Makhanya, uMnu Babo Mseleku, uRev Nawa, uChief Mgoduka Buthelezi yiwona avela emlandweni esingafisa kuqanjwe ngawo lezo zindawo. Obaba u-Alsace Makhanya noChief Bhekizitha Makhanya, kungaqanjwa ngabo le migwaqwana esikhuluma ngayo.