Siyobusa ngembuzi nebhodlela KwaZulu-Natal entsha
UMA iKwaZulu-Natal isiyizwe elizimele ngaphansi kweSilo samabandla onke, sizokwazi-ke ukulaxaza lesi sibongo sabelungu esithi Natal, kuvele kube yiKwaZulu nje kwaphela.
Ngikhumbula sisakhula le eBhobhoyi ngaphansi kweNkosi uMakhanda, bonke abantu asebekhulile kwakumele babe nekhadi lobuzwe, elalifakaza ukuthi ngempela ungowendabuko KwaZulu.
Okwakuxaka kakhulu kwakuwukuthi yize wawunalo leli khadi, kwakusaphoqelekile ukuba uthathe udompasi wohulumeni wabelungu.
Phela incwadi yobuzwe yilokhu okwaziwa ngepasipoti - elichaza ukuthi ungumsinsi wokuzimilela kuliphi izwe.
Leli khadi esasiliphatha thina, lalingeke likungenise ngisho naseSwazini, babeyokokha ngensini onogada basemngceleni, babone nje ukuthi cha ziyantunta lapha ekhanda. Leli khadi nokuningi nje, kwakucelwa enduneni kanti kwakwaziwa ukuthi kawuyi enduneni ulambatha.
Kwakumele uphathe ibhodlela likagologo nembuzi ephilayo. Uma ungenzanga kanjalo, isicelo sakho sasingalalelwa nokulalelwa. Kwakunomunye ubhuti waseMadakane - khona lena ngakithi eBhobhoyi - kodwa enhla neMashisini (Murchison), eyaze yaneminyaka engamashumi amathathu ubudala ingenadompasi ngoba nakhu abakubo babengenayo imali yebhodlela nembuzi ephilayo.
Le nsizwa eyayaziwa ngoKhandaleveni, yazalelwa ekhaya, ngakho yayingenalo nekhadi leli lasesibhedlela. Phela izitifiketi zokuzalwa kwakuyinto engaziwa emakhaya. Ingane yayizalwa, ikhuliswe nje kungabi ndaba zalutho.
Kuyothi-ke uma isiqala ukumila uboya bobunsizwa bese kuba yilapho-ke isithathelwa udompasi, ukuze iye kwaTeba iyobhalisela umsebenzi wasezimayini. Kwakuba nzima-ke ukuthola udompasi kulabo abazalelwe emakhaya.
Omabhalane baKwaNdabazabantu babengawubambi umshini, futhi bedelela beqhuba intwala ngelikhulu iwisa leli, ugadimpukane.
Kwakuye kuthi uma kunjalo, abazali baye enduneni, induna iye enkosini, inkosi-ke ibhale incwadi efakazayo ukuthi ngempela uzalwa esigodini sayo futhi nabazali bakho iyabazi.
Leyo ncwadi yayigxivizwa-ke, ube usuya nayo KwaNdabazabantu uyofaka ngayo isicelo sikadompasi.
Kwakuba lula uma unekhadi lasesibhedlela ngoba phela lalinemininingwane ngosuku ozalwe ngalo, isikhathi, isibhedlela, nonesi owayebelethisa, udokotela owayekhona, isisindo sakho neminye nje imininingwane engathi shu.
Usuku lokuzalwa lwengane lwalwaziwa ngezigameko njengoba uKhandaleveni yena kwakuthiwa wazalwa ngezimvula zikazamcolo, mhla inkanyamba isuka esizibeni somfula uMzimkhulu ithuthela emfuleni uMthamvuna, emngceleni weTranskei.
Sengiyayibona nje iKwaZulu entsha ngamehlo engqondo, lapho kukhala khona isicathulo sezinduna namakhosi futhi yonke into itholakala ngebhodlela nembuzi ephilayo.
Kukhona abathi uJacob Zuma kungenzeka aqokwe abe ngumengameli waleli lizwe elisha ceke ngoba nakhu phela unesipiliyoni salesi sikhundla.
Izimpukane eziluhlaza zithi umndeni waseNdiya, amaGupta phela, uzobuya ungasadle nkomo zamuntu, uzobheka ukuthi kukhona yini ongakumfimfitha KwaZulu.
Isithabathaba somuzi wawo, lona oseSaxonwold eGoli, uyowusiphula nezimpande okwesihlahla, ziyowuthi dinsi eNkandla.
Lo mndeni ngeke uqale enduneni ngoba phela uzobe unobhululu osesikhundleni esiphakeme. Thina esesihlala eGoli, sekuyomele sikhethe ukuthi siwa ngakuliphi icala lomngcele.
Uma sesivakashela abazali nezihlobo, kuyofuneka ukuba umuntu ahlale enamabhodlela endlini alungele uhambo.
Okwezimbuzi eziphilayo, angazike ukuthi umuntu uyozigcinaphi ngoba imithetho yasesilungwini kayivumi ukuba sibeke imfuyo egcekeni.
Kuye kuthiwe icebo liyazakha, njengoba noKhandaleveni wathi uma ebona ukuthi ngeke akwazi ukuyosebenza ezimayini ngaphandle kukadompasi, wagcina esekhethe ukuba yisimbamgodi, embela abantu bendawo imigodi yezindlu zangasese.