Abagijimi bazoshukana koweTotalsports
Kubhekwe uGlenrose ukunqoba lo mjaho waseThekwini
KUTHWELWE ngeqoma uGlenrose Xaba ( osesithombeni) noTish Jones ukuba bazichanasele kwiTotalsports Women’s Race 10km ehambisana ne-5km ezokuba ngeSonto kusuka ngo-8 ekuseni eKings Park Athletics Stadium, eThekwini.
UGlenrose uzokuya kulo mjaho ehambela phezulu kulandela ukudla kwakhe ubhedu kwiSpar Women’s Challenge eThekwini kanti uTish ube yingqwele yeSpar kuleli dolobha.
Kulo mjaho wangeSonto kubukeka umbango wesicoco uzokuba phakathi kwalaba basubathi kanti ingqwele izohlomula ngo-R10 000.
Bobabili laba basubathi bazokube beqala ukuzogijima iTotalsports okungomunye wemijaho ekhula ngesivinini esikhulu njengoba eminye imilenze iseGoli naseCape Town. Yomibili le milenze izogijinywa ngomhla ka-9 kuNcwaba (August) okuyiholidi labantu besifazane.
“Ngiyakuthanda ukugijima eThekwini, nokubhekana nabagijimi abahlonishwayo emhlabeni. Ukwenza kahle kwiCross Country kule minyaka edlule kungisize kakhulu ukwakha isivinini. Kulo mjaho ngizimisele ngokwenza kangcono isikhathi sami se-10km esiwu-32:22 engisenze ekuqaleni konyaka,” kusho uGlenrose.
UTish uthe uyakujabulela ukugijima i-10km ngoba yibanga elihlanganisa zonke izinhlobo zabantu.
AbeCross Country bazokhiphana inkani ngoMgqibelo kusuka ngo-11h50 KwaXimba, eSithumba. Abasubathi abazokwenza kahle esigabeni esivulelekile kulo mjaho ohlelwe yiHollywood Bets Athletics Club, bazohlomula ngoR1 000 kubo bobubili ubulili kube ngu-R500 kwabangene isibili. Abafuna ulwazi ngalo mjaho bangaxhumana neKZNA kwethi: 031 312 9374.
INxamalala Athletics Club ihlele iFlorence Ndlovu Memorial Race yebanga lika-21km ezokuba ngeSonto elizayo eMpendle. Imingenelo yalo mjaho itholakala ePoobie Naidoo’s Sports Shop eMgungundlovu nasemahhovisi kamasipala waseMpendle. Ngolwazi kushayelwa uThuso Mosiea kwethi: 083 395 0547 noma uZuma kwethi: 072 201 0080.