AMATHEMBA AKULELI AKUMORAKE E-ALGERIA
KUBHEKWE uGontse Morake ( osesithombeni) ukuba aphephezelise ifulegi leNingizimu Afrika phezulu kwi-African Youth Championships eqala namuhla ngoLwesine isongwe ngoMgqibelo mhla ka-28 e-Algiers, e-Algeria.
UGontse ngomunye wabasubathi okubhekwe ukuba benze kahle kule midlalo kulandela ukuphula kwakhe irekhodi lakuleli le400m Hurdles neleTriple Jump lodado kwiSouth African National Track and Field ekuqaleni konyaka eCape Town.
UGontse ngomunye wabasubathi okungangabazeki ukuthi uzokwazi ukuhlomulela elakuleli indondo yegolide kule midlalo ngenxa yokuba sefomini enhle kulezi zinsuku. Nasemidlalweni yeSouthern Region ebiseBoksburg, wenze okufanayo edla ubhedu kuwo womabili amabanga awagijimayo.
Omunye umsubathi okubhekwe ukuba enze kahle nguRose Xeyi kwi-100m. Elakuleli lilale endaweni yesibili kule midlalo nyakenye lapho libuye khona nezindondo eziyisikhombisa zegolide, ezimbili zesiliva nezintathu zethusi eGaborone, eBotswana.
Abasubathi abazokwenza kahle kule midlalo bazothola ithuba lokumela elakuleli kwi-2018 Youth Olympic Games azokuba mhla ka-6 kuya kumhla ka-18 e-Argentina.
UMengameli we-Athletics South Africa (ASA), u-Aleck Skhosana, uthe bajabule kakhulu ngeqembu eliqokiwe. Uthi unethemba lokuthi elakuleli lizokwenza kahle kule midlalo. Uthi banamaqembu amaningi abawathumele emidlalweni eyahlukene kulezi zinsuku.
“Kumanje sinabasubathi abaseFinland bamajuniya, abanye bakwiWorld Cup eLondon kanti maduzane kuzokuba neCAA African Track and Fied Senior Championships,” kusho uSkhosana.
Selilonke iqembu lakuleli eliya e-Algeria lididiyelwe kanje, kwabesilisa: uLuke Davids; uJayson Weber; uTshepo Ntuntwana; uMichael Schoeman; uLindokuhle Gora; uKarel Olwage; uNikolai van Huyssteen; uJason Tito; uSifiso Miya; uLohan Potgieter; uFrancois Prinsloo; uDamien Bothma noJano Esterhuizen.
Kwabesifazane: uRose Xeyi; uNicola van der Merwe; u-Amy Naude; uPrudence Sekgodiso; uNicole Louw; uCarmie Prinsloo; uCara du Preez; uKayla van der Bergh; uGontse Morake; uBianca Erasmus; uNicole Janse Van Rensburg; uMieke Basson; uDane Roets; uPhethihisang Makhetehe noChane van Zyl.