USiyanda Xulu weluleka oxoshwe yiChiefs
ITeam of Choice ithungatha umgadli ovuthayo
WELULEKA umdlali osanda kukhonjwa indlela kwiKaizer Chiefs uSiyanda “Magazi” Xulu oshiye kabuhlungu eNaturena nokho wafika waphenduka isilomo kwiMaritzburg United.
Ekhuluma emuva kancane kwesigcawu sabezindaba kwethulwa iKZN Premier’s Cup uXulu, uthe ululeke uKeagan Buchanan ukuba alibale yikho konke okwenzeke kwiChiefs kodwa agxile emsebenzini asewuqashelwe kwiTeam of Choice. UBuchanan ugijima esiswini. UXulu uthi okubaluleke kakhulu wukuthi kumele azimisele kakhulu kukho konke akwenzayo ukuze ezozifaka ezinhliziyweni zabalandeli beTeam of Choice abakhula isizini nesizini.
“Ngizomsiza kakhulu ukuze asheshe ajwayele ekilabhini. Ngiyazi ukuthi kunzima kangakanani uma usuka ekilabhini enkulu ujoyina encane, ufika nomthwalo emahlombe. Kwangisiza kakhulu ukuguqula umqondo ngesikhathi ngiqala kabusha impilo. Ngiyazi ukuthi ngeke kube yinto elula, kumele anikwe isikhathi ukuze azinze kahle. Kunzima kakhulu khona ukushintsha impilo. Kumele ahlale ekhumbula ukuthi yimidlalo emihle ekufaka ezinhliziweni zabalandeli,” kusho uXulu ogcizelele ukuthi kuningi okumele bazibophezele kukhona njengoba isizini isizoqalwa.
Uthi nakuba kuzokuba nzima kodwa bazimisele ngokuphinda benze kahle kwisizini ezokwethwasa. Uthi kumele baqhubeke nokulwela ukubalwa namakilabhu aphezulu kwi-log.
“Okusiphumelelisa kakhulu wukuba yimbumba singabadlali. Imidlalo yobungani izosisiza kakhulu ukucijela isizini ezayo ikakhulukazi iPremier’s Cup. Ngithembisa abalandeli bekilabhu ukuthi bazobhema bakholwe uma sekuqala iPremier’s Cup,” kusho uMagazi oveze ukuthi uzimisele ngokuqhubeka nokudlala kahle okwenze waqokelwa kwiBafana Bafana ngokuphela kwesizini edlule.
UFadlu Davids ocija iTeam of Choice, uhambe emazwini kaXulu wabe esenxusa abalandeli ukuba bangamfaki kakhulu ingcindezi uBuchanan kwazise usenesikhathi eside agcina ukudlala. Uthi unethemba lokuthi uzosheshe ajwayele.
UDavids uphethe ngokuthi usethungatha umgadli ozovala thanqa isikhala esivuleke beshiywa nguEvans Rusike ojoyine iSuperSport United ngesizini edlule. Uthi uma esethole umgadli ovutha uphondo, iqembu lakhe lizokube seliyinqanawe.