USENETHEMBA OXOSHWE YI-BUCS
UHLALELE ethembeni lokuthi uzowuthola umsebenzi maduzane umdlali olaxazwe yi-Orlando Pirates emuva kokuhlala kuyona iminyaka engu-6.
IBucs inqume ukungayivuseleli inkontileka ka-Ayanda “Malume” Gcaba obeyisitobha sayo, emuva kokuba iphelile ngenyanga edlule. Lo mdlali uke wazilolonga neBlack Leopards esanda kunyukela kwi-Absa Premiership kodwa kwagcina kungalunganga.
UGcaba ekhuluma naleli phephandaba, ulitshele ukuthi akakaliphonsi ithawula, uhlalele ethembeni lokuthi ikhona ikilabhu ezomtakula kulesi simo abhekene naso sokungabi nawo umsebenzi.
“Njengamanje ngiseGoli ngijima khona. Ngike ngaziqeqesha neLeopards kodwa kasaze savumelana ngemali. Abebefuna ukunginika khona bekukuncane kakhulu, ngibone kungcono ngiqhubeke nokufuna umsebenzi kwenye indawo. Njengamanje ngilinde abaphathi bami bakwaProsport International, kukhona abasakuhlanganisa kuzothi kungahlangana bese bengazisa okwamanje ngisazijimela ngedwa,” kusho uGcaba.
Lo mdlali uke waphumela obala ngokuthi ufisa ukubeka amakhokho ethala egijima kumaZulu kanti nomqeqeshi wawo uCavin Johnson, uvumile kuleli phephandaba ukuthi angakujabulela ukuba nomdlali onjengaye ngoba ungumfana wendawo futhi unesipiliyoni.
UGcaba uthi alukaze lumthinte uSuthu.
“Ngabe ngiqamba amanga angazi ukuthi kwenzakaleni kodwa awakaze angithinte AmaZulu. Angifuni ukukhuluma amanga ngiyawathanda futhi ngingakujabulela ukudlala kuwona. Empeleni nje ngingakujabulela ukudlalela enye kumakilabhu angasekhaya. Kodwa lokho akusho ukuthi ngeke ngiye kwamanye amakilabhu angaphandle. Ithemba angililahlile ngizowuthola umsebenzi,” kusho uGcaba.
Isikhulu soSuthu, uLunga Sokhela, sisanda kutshela leli phephandaba ukuthi sebewavalile amabhuku okusayinisa abadlali abasha.