UMTHALANE UFISA UKULIVIKELA E-KZN ELE-IBF
UDINGA impi eyodwa yokugcina kulo nyaka uMoruti “Babyface” Mthalane ohambela phezulu kulezi zinsuku njengoba ehlule uMuhammad Wassem wasePakistan empini ebinzima ye-International Boxing Federation (IBF) Flyweight ngeSonto ekuseni eMalaysia.
UMthalane otheleke kuleli ngoLwesibili, uthi uyalelwe yi-IBF ukutomula ibhokisa azovikela kulona leli bhande ungakapheli lo nyaka.
“Okwamanje ngisaphumule ngemuva kokubuya kule mpi. Angizimisele ngokulwa ezinyangeni ezimbili ezizayo. Ngibheke ukulwa okungenani ezinyangeni ezintathu zokugcina zokusongwa konyaka. Ngiyafisa ukuthi le mpi ibe KwaZulu-Natal ngoba ngihlale ngithola okukhulu ukwesekwa khona.
“Okuhle wukuthi akekho uphromotha enginenkontileka naye. Ngingaqhathwa yinoma ngubani esingavumelana ngakho konke naye. Njengoba bengilwa ngeSonto nje, bengiqhathwe yiGolden Boy Promotion ka-Oscar De La Hoya neManny Pacquiao Boxing Promotion kaManny Pacquiao naye obelwa empini enkulu.
“Ngingajabula kakhulu ukuvikela leli bhande ekhaya,” kusho uMthalane ozivumele ngowakhe ukuthi ibinzima kakhulu impi yangeSonto njengoba evuke phansi ngomzuliswano ka-11, kodwa wagcina enqobe ngamaphuzu.
UMthalane ugcine ukulwa KwaZulu-Natal ngo-2015 empini abeyihlelelwe nguThulani “Nkunzi” Magudulela weLudonga Promotions. Ubevikela ibhande leInternational Boxing Organisation (IBO) Flyweight alishiyile ngoba esefuna ukulwela ele-IBF ake waliphatha phambilini.
Uthi impi yakhe elandelayo ingcono ngoba uzozikhombela yena ukuthi ufuna ukulwa nobani. Akufani noma kusuke kuphoqelekile ukuba ulwe nomuntu okleliswe endaweni yokuqala ngoba uma ningavumelani, impi igcina isibhidelwa bese amabhokisa ethola imali engatheni.