Osinde esahwa umlenze uzogijima okaMandela
Unephupho lokugijima iComrades Marathon ngo-2025
UMHLENGI Gwala osinde ekufeni ebanjwa ngabantu angabazi bazama ukumnqamula imilenze ngesaha ngasekuqaleni kwalo nyaka, uhlela ukuba yingxenye yeMandela Marathon Triathlon Run ezokuba mhla ka-26 kuNcwaba (August) eMgungundlovu.
UGwala utshele ILANGA ukuthi useqalile ukuziqeqesha nakuba kusenzima ukuba azenzele zonke izinto.
Kuzokhumbuleka ukuthi umdlalo wakhe, iTriathlon, uhlanganisa ukugijima, ukubhukuda nokugibela ibhayisekili. Uthi okunzima kakhulu njengamanje wukugijima kwazise usaxhuga.
“Lo nyaka sewuphelile kimina. Sengizobona kahle ngonyaka ozayo. Nokho kunemijaho eminingi engizokuba yingxenye yayo ungakapheli lo nyaka ukuziqeqesha. Ngizokwenza iTriathlon kwiMandela Day Marathon ngoNcwaba. Ngizodlala ibhayisekili kuphela ukuze ngingezothunukala.
Kunomunye umjaho engizokuba yingxenye yawo ngoMfumfu (October). Okuningi njengemidlalo yokuhlunga ngicabanga ukuthi ngizokuba yingxenye yakho ngonyaka ozayo,” kusho uGwala.
UGwala uthi ubezimisele ngokuba yingxenye yeComrades Marathon ngo-2022 kodwa waphazanyiswa wukulimala. Nokho uthi ukholwa wukuthi lo mjaho uzokwazi ukuwugijima ngo-2025.
Izolo ngoLwesithathu uMhlengi ubeyingxenye yomjaho wokugubha iminyaka elikhulu kwazalwa uDkt Nelson Mandela obuseCape Town.
Uthi lo mjaho bekungowokusiza izingane eziyizintandane.
“Impilo iyathembisa manje. Ngiyacabanga ukuthi ezinyangeni ezizayo ngizokube sengibuyele ngokugcwele emdlalweni wami.
"Ngisafuna nokumela nezwe lami emidlalweni eyahlukene,” kusho uGwala.
Ungaphuthelwa yiLANGA LangeSonto kwazise lizokube likuphathele ukusuka nokuhlala ngengxoxo kaMhlengi ngempilo yakhe yangasese.