Kuputshuka eyokushibha koweChiefs
Unerekhodi lokungasiqedi isivumelwano senkontileka
KUVELA ezintsha ngokuqashwa kukaGiovanni Solinas ( osesithombeni) wase-Italy ongumqeqeshi omusha weKaizer Chiefs othulelwe abalandeli ngoLwesihlanu olwedlule.
IChiefs ishaqise abathandi bebhola imemezela uSolinas, oke walolonga iFree State Stars, njengomqeqeshi wayo omusha. Lo mqeqeshi uqashwa nje, ubengenawo umsebenzi, ubesehlale unyaka wonke engaqeqeshi ndawo. Enjalo nje, unerekhodi elibi lokungayiqedi isizini ekilabhini esuke imqashile.
Usayine inkontileka yeminyaka emibili neChiefs enesivumelwano sokuyelula ngonyaka. Leli phephandaba lithole ngomthombo walo osondelene kakhulu noSolinas ukuthi uqashwa nje, yingoba imenenja yakhe ezinze kuleli, uSahid Adebayor, yiyona emncengele ezikhulwini zeChiefs yathi uzimisele ngokuthatha noma yimalini azoyinikwa yinqobo nje uma ezothola umsebenzi.
Kuthiwa emuva kokuba le menenja itshele iChiefs ukuthi lo mqeqeshi ufuna ukuhola malini, igxume yahlala ibona ithuba lokonga imali. Kuthiwa ufune imali engaphansi kakhulu kwebiholwa nguSteve “Mphathi” Komphela azongena esigqikini asishiyile.
Leli phephandaba lithole ukuthi uKomphela ubegoduka nemali engaphezulu kuka-R600 000 zinyanga zonke ingakafakwa imali yokusayina (signing on fee) okuthiwa kwayona kayibi ngaphansi kuka-R800 000, kanti uSolinas yena kuthiwa uzohola imali engaphansi kuka-R280 000 zinyanga zonke, engenayo imali yoku- sayina.
“IChiefs namanje ngabe kayinaye umqeqeshi ukuba u-Adebayor akazange ayitshele ngoSolinas. Izingxoxo kazithathanga isikhathi eside ngoba uSolinas nomphathi wakhe bebevuma yonke into kwazise vele unenkinga yemali. Kunengane yakhe enenkinga, imali yakhe eningi iphelele kuyona eyiyisa ezikhungweni zokuhlumelelisa.
“Yingakho engayiqedanga nesizini okokuqala kwiFree State. Izingxoxo naye kazithathanga ngisho usuku kwavunyelwana. Kodwa-ke yena uyawazi umsebenzi. Nginethemba lokuthi uma enikwa isikhathi ukwenza umsebenzi ngendlela uzoyitakula iChiefs,” kusho lo mthombo.
Leli phephandaba lishayela u-Adebayor ngalolu daba, wale waphetha ukuphawula ngalo wathi makuthintwe iChiefs.
“Engingakusho nje wukuthi sijabule ukuthi konke kuhambe kahle phakathi kwethu neChiefs, akukho esingakhala ngakho. Engikucelayo nje wukuba anikwe ithuba uSolinas ngoba uyawazi umsebenzi wakhe futhi noma kanjani uzofika nomehluko omkhulu kwiChiefs.
"Yebo yimina engishayele iChiefs ngalo mqeqeshi nayo yakhombisa ukumthanda. Yilokho nje kuphela engingakusho okunye ungakuxoxa nayo,” kusho u-Adebayor.
Imizamo yokuthola uBobby Motaung oyiMenenja-jikelele yeChiefs ukuba aphawule ngalolu daba iphunzile njengoba ucingo lwakhe belukhala kodwa engalubambi. Nokho leli phephandaba lithole ukuthi wehla enyuka uzama ukutholela lo mqeqeshi amaphepha amgunyaza ukusebenza kuleli.
Kuthiwa iChiefs iqale ngoMsombuluko ukuhlanganisa konke okudingakalayo ukuze lo mqeqeshi athole igunya lokusebenza kuleli. Nokho kuthiwa uqale ngoMsombuluko ukujimisa.
Nocingo lukaVina Maphosa wezokuxhumana kwiChiefs belukhala kodwa lungabanjwa, wathunyelelwa umqhafazo aziswa ukuthi senza lolu daba kodwa kwaze kwashaya isikhathi sokuloba engakaphenduli.