USOLA UKUTHAKATHWA OHLUSHWA YISIFO SENHLIZIYO
UZAMA inhlanhla kwiReal Kings egijima kwiNational First Division (NFD) umdlali oyalelwe ngodokotela ukuba ayeke ibhola ngenxa yokuhlushwa yinhliziyo.
UPapy Faty (27) waseBurundi oke wagijima kwiBidvest Wits, utheleke ejimini yeKings ngoLwesibili ngenhloso yokuba imsayinise ukuze abuyele ebholeni.
Lo mdlali uxoshwe yiWits ngo2016 emuva kokuba odokotela abangochwepheshe benhliziyo beyalele le kilabhu ukuba ingamudlalisi ngoba impilo yakhe isengcupheni.
Uke wazama inhlanhla kwiRoyal Eagles ngonyaka owedlule kodwa emuva kokuba imuhambise kuchwepheshe wenhliziyo yajika esithubeni yangabe isamsayinisa.
Lo mdlali uveze ukuthi kukhona omthakathile emuva kokuba elahlekelwe yijezi ejimini yeWits.
Uthi emuva kokulahleka kwejezi lakhe yilapho kuqale khona le nkinga njengoba ewe ejimini nasemdlalweni we-Absa Premiership.
Leli phephandaba lishayela uSimo “Govuza” Dladla ongumqeqeshi weKings, uthe uyasiqonda isimo esibhekene nalo mdlali kodwa akakwazi ukumehlulela.
“Okufanele sikuqonde wukuthi kasiyena uNkulunkulu ukuthi singehlulela umuntu kodwa lokho akusho ukuthi akufanele sinakekele isimo sakhe sempilo ngoba nayo ibalulekile.
Umphathi wakhe ungitshe-le
Umphathi wakhe uthe izinkinga abenazo zempilo sebezilungisile...
ukuthi izinkinga abenazo zempilo sebezilungisile kodwa nami ngisazohlala nabo sixoxe ukuze ngizanelise, uma kuwukuthi ngiyagculiseka ngengikubona enkundleni,” kusho uDladla.
U-Uhuru Mwambungu waseTanzania oke wadlala kwi-Eagles, naye uzama inhlanhla kule kilabhu.
“Yebo naye ukhona lapha, kukhona nomunye umgadli waseLesotho engimubone kwiCosafa Cup. Kukhona nomunye futhi umgadli wangaphandle engimlindele.
" Kodwa kubona bonke ngidinga umgadli oyedwa onesipiliyoni ozokwazi ukulekelelana nalaba bagadli abancane enginabo,” kusho uDladla.
Uthi namuhla ngoLwesine uzokwelula inkontileka ka-Ayanda Ngcongo (29) odlala esiswini kule kilabhu, bese esayinisa uBafana “Gattuso” Dlamini (24) oke wagijima kwiChippa United.
UDlamini unama-cap angu-8 eqenjini lesizwe lakuleli lika-U/23 bese eba neyodwa eqenjini lesizwe, iBafana Bafana.