Ususemome umhlangano weBrics
KUYASUKA lokho ngomhlangano wezinhloko zamazwe awu-5 akumfelandawonye wezomnotho, okuyiBrazil, iRussia, i-India, iChina neSouth Africa (Brics). Lo mhlangano uzokuba seGoli, mhla ka-25 kuya mhla ka-27 kwephezulu.
Lo mhlangano ubakhona njalo ngonyaka lapho kuba nezingxoxo okuthintwa kuzo izihloko ezimayelana nokuhlela ezombusazwe nezomnotho nenhlalo yabantu. Amazwe ayadedelana ngokuphatha isihlalo kule mihlangano njengokulandelana kwezinhlamvu zamagama awo amalungu - Brics, njengoba kowanonyaka kuyiNingizimu Afrika.
Ngaphandle kokuhlangana kwezinhloko zemibuso, ukubambisana kwala mazwe kuleli shumi-nyaka eledlule kukhulisiwe ukuze ngaphansi kwalolo bambiswano kube nezinhlelo zemihlangano eyevile kwewu-100 yezigaba ezifanayo lapho ukubambisana kwamalungu kuhlukaniswe imizila ( tracks) emithathu okuyilena: ukuxhumana ezingeni losomaqhinga phakathi kohulumeni bala mazwe, wukubambisana ezingeni lezinhlangano ezincike kohulumeni, kanjalo nokuxhumana ngqo phakathi kwabantu bala mazwe.
IYINI YONA I-BRICS?
USolwazi Bongile Mayaba weBMM Incorporated, uthe iBrics lena yinhlangano ewubambiswano lwamazwe asathuthukayo ngokwezinga lomnotho, okuyiBrazil, Russia, India, China neSouth Africa. Lawa ngamazwe angamalungu asesigabeni esibizwa ngeG20 emhlabeni jikelele.
Ukuvela kwayo kusukela kwinkulumompikiswano equbuke kwi-United Nations (UN) ngelungelo lobulungu kwi-UN Security Council nelungelo lamandla aziwa nge-veto. Kulesi sigungu kunamazwe asezingeni elaziwa ngele- third world ngokwentuthuko yezomnotho, okuyi-India, iNingizimu Afrika neEgypt.
Isikhalo bekuwukuthi ayahlala kulesi sigungu kodwa hhayi njengamalungu agcwele futhi anegunya elibizwa nge-veto njengoba kunjalo emazweni asentshonalanga i-UN eyaqalwa ngawo. Ngenxa yokugweva kwalawo mazwe ngezizathu ezaziwa yiwona, kubesekuvela umbono wokuba kube nenhlangano yamazwe asezingeni lomnotho osathuthukayo, okube yiwona lawa asebizwa ngeBrics.
Lokhu kwenzeke ngesikhathi kunguMnu Thabo Mbeki umengameli waseNingizimu Afrika. Kunqunywe ukuba lo mfelandawonye omusha ugxile kwezentuthuko njengoba isibonelo salokhu, phakathi kokunye kuneBrics Bank.
USolwazi Mayaba uthi ibekhona imvunge evela kwezinye izifundiswa zaseNingizimu Afrika zikhala ngokuthi leli lizwe ligagamelile ngokuba yilungu lale nhlangano entsha, ikakhulukazi ngezinga ekulona nxa iqhathaniswa namanye amalungu alolu bambiswano. KUZISIZA NGANI IZAKHAMIZI UBULUNGU BEZWE LABO?
Maqondana nombuzo othi kubasiza ngani abantu phaqa ubulungu bezwe labo kule nhlangano, ILANGA lixhumane noMnu Bongani Tembe okhulumela uMnyango wezokuThuthukiswa koMnotho KwaZulu Natal.
Maqondana nombuzo othi iKwaZuluNatal izuzani kulokhu, impendulo ithe ukuhwebelana kwaleli lizwe namazwe angamalungu eBrics sekwenyukile njengoba imikhiqizo yethu ithola izimakethe lapho izothengwa khona. Embuzweni wokugcina othi yini lesi sifundazwe esigabe ngayo ukuheha abatshalimali, incazelo ithi phakathi kokunye yilokhu iKwaZulu-Natal ezokhangisa ngakho:
* Amachweba amabili amakhulu, okuyiRichards Bay neTheku, yinkundla yezindiza iKing Shaka esezingeni lomhlaba, yimigwaqo esezingeni elihle kanjalo nemizila yezitimela, izikhungo zemfundo ephakeme ezamukelekile emhlabeni wonke, uhlelo lwemfundo oluzimele ( private education), yisibalo esikhulu sezisebenzi, yisimo sezulu esihle nabantu bayo abamnene.