UZAKHELE ISIGCWAGCWA KUBALANDELI BE-CHIEFS
UZIFAKELE isigcwagcwa kubalandeli beKaizer Chiefs uPatrick Mabedi olisekela lomqeqeshi kule kilabhu njengoba befuna ahambe kubuyiswe uDoctor “16V” Khumalo ongomunye wezinkakha zale kilabhu.
IChiefs iguqiswe yiMamelodi Sundowns ngo-2-1 koweShell Helix Ultra Cup ngoMgqibelo ntambama eFNB Stadium, eSoweto. Amagoli eDowns abekwe enethini nguJeremy Brockie noThemba Zwane, kwathi eleChiefs lashaywa nguBernard Parker. Lo mqhudelwano ubuqala ukugijinywa ngale sizini kanti abalandeli bala makilabhu bebehlose ukubona ngawo abadlali babo abasha kuphinde kukhangiswe nangamajezi amasha ala makilabhu.
Nokho umthombo weLANGA obusenkundleni, ulitshele ukuthi abalandeli baphume benxapha yisenzo sikaMabedi bekhala ngokuthi uvele wabuyisa amakhehla ekubeni bekhona abadlali abasebancane nabanye abasha bale kilabhu. Uthi bebelibeka ngesihloko elokuthi makahambe kubuyiswe u-16V azolekelela uGiovanni Solinas wase-Italy osanda kuqashwa njengomqeqeshi omusha weChiefs.
Omunye umlandeli wokuqina weChiefs obesenkundleni okhulume naleli phephandaba, ocele ukuba lingadalulwa igama lakhe, uthe: “Umdlalo onjena kakufanele usibuyisele amakhehla esiwaziyo. Bekufanele afake uMalope, uMahlasela hhayi ukuthi asibuyisele abantu abayizahluleki. UMabedi usikhombisile ukuthi usabuya nomqondo kaSteve Komphela okucacayo ukuthi uzowufaka nakuSolinas. Siyacela kubaphathi bamzamele umsebenzi kwenye indawo noma esikimini esincane sekilabhu bese bebuyisa uKhumalo azosiza uSolinas.
“UMabedi ukhombisile ukuthi iChiefs ingaphezulu kwakhe, wenze inqwaba yamaphutha. Ngaphandle nje kokuthi uhlulwe ngu-B weSundowns, kunesikhathi lapho ekhiphe khona umdlali ohlaselayo sihlulwa wafaka isitobha. Leyo nto isitshela ukuthi lo muntu akahlakaniphile. Siyacela kubaphathi babuyise uKhumalo ngoba uma kungenjalo sisazobhubha,” kusho lo mlandeli.
Ekhuluma emuva komdlalo uMabedi, uthe akazisoli nakancane ngesikimu asibophelile.
“Sidlale ngeqembu elinesipiliyoni futhi ebelihlelekile, ngokwami nje lenze kahle. Sizame konke okusemandleni kodwa ngikholwa wukuthi besingenza kangcono. Kancane kancane sizogcina sifinyelele lapho sifuna khona izinto zizohlangana,” kusho uMabedi.
UPitso “Jingles” Mosimane ocija iDowns, uthe le nkomishi ayisho lutho kuyena.
“Lona bekungumdlalo nje wesihle besizilulela imisipha ngoba kuseza imidlalo emqoka kithina. IChiefs bekufanele siyihlule ngo-2-0, isizwe wubudedengu bethu emuva. Kodwa ngijabule ngokwenziwe ngabadlali bami abangavamisile ukuthola isikimu ikakhulukazi u-Anthony Laffor, ukhombisile ukuthi ungumdlali omqoka. NoSiphelele Mkhulisi ngokunjalo muncane kodwa udlalise okweqhawe,” kusho uMosimane.