Amphoyisa emkhondweni wababulale oso matekisi
Badutshulwe bephuma emngcwabeni wobulawe ngeledlule
SISHAQISE abaningi isigameko sokubulawa ngesihluku kwabantu abawu-11 abadutshulwe ngoMgqibelo phakathi kwaseColenso naseLadysmith bephuma emngcwabeni, belibangise eGoli.
Kubikwa ukuthi abashonile bebehamba ngeToyota Quantum, bavukelwa ngabantu abangaziwa endleleni bavulela ngenhlamvu kwashona abawu-11, kwalimala kanzima abawu-4 kwathi ababili baphuma bengenamyocu.
Izisulu kuthiwa bekungabashayeli abangaphansi kwe-Ivory Park Taxi Association, eGoli. Bebephuma emngcwabeni womnikazi wamatekisi odutshulwe ngeledlule khona Kwandonga Ziyaduma.
Okhulumela iSouth African National Taxi Council (Santaco) kuzwelonke, uMnu Thabisho Molekelwa, usigxekile isenzo sokubulawa kwabantu ngale ndlela. Uthe okwamanje akukho okuningi abazokuphawula kodwa bazolinda abeSantaco KwaZulu-Natal ukuba bathumele umbiko mayelana nalesi sigameko njengoba senzeke khona.
Utshele ILANGA ukuthi ngeke bakwazi ukuphawula kakhulu mayelana nezinsolo zokuthi lokhu kuhlobene nombango wamatekisi noma cha, kuze kube bathola umbiko ogcwele.
UMnu Sfiso Shangase weSantaco KwaZulu-Natal, uthe konke bakuyekele ezandleni zamaphoyisa ukuba kutholakale imbangela yokubulawa kwalaba bashayeli.
"Siyasigxeka kakhulu lesi senzo ngoba uma ngabe kukhona okuxatshenwe ngakho noma okubangwayo, kumele ngaso sonke isikhathi kuhlalwe phansi kuxoxwe. Sinazo izinhlaka ezibhekelela ukuxazulula izinkinga, ngakho sisigxeka kakhulu lesi senzo,” kusho uMnu Shangase.
Uthe okwamanje bebengakayitholi imindeni yabashonile, kodwa badlulisa amazwi enduduzo kubona bonke abashonelwe. Utshele leli phephandaba ukuthi okuningi mayelana nalesi sigameko - kuhlanganisa nokuthola imindeni yaba- shonile - bazokwazi uma kuqhubeka izinsuku kwazise nophenyo lwamaphoyisa luselusha.
Izolo uNgqongqoshe wezokuThutha KwaZulu-Natal, uMnu Mxolisi Kaunda, uhambele indawo yesigameko eyohlola umonakalo.
Esitatimendeni esithunyelwe kwabezindaba, uMnu Kaunda ucashunwe ethi akukho okutholakele okukhombisa ukuthi lesi sigameko sihlobene nezinxushunxushu ezike zaba khona eLadysmith, ezigcine ziholele ekubeni kumiswe ukusebenza kwamatekisi angaphansi kweSizwe Taxi Association neKlipriver Taxi Association.
UMkhuzi wamaPhoyisa, uGeneral Khehla Sitole, naye usigxekile lesi senzo wathi usejube ithimba elihlanganisa oKlebe, abeCrime Intelligence neSpecial Task Force ukuba bathungathe abasolwa.
UBrigadier Vish Naidoo okhulumela amaphoyisa kuzwelonke, ebuzwa ukuthi lokhu ngabe kuhlobene nombango wamatekisi, uthe okwamanje ngeke bakwazi ukukuqinisekisa lokho ngoba kusaqhubeka uphenyo.