Uchashwe ngenhlamba kwiDundee
Ubesolwa ngokuba nesandla ekuhoxisweni kwehhashi ebeliwinile
BASONGA ngokuluyisa enkantolo udaba lwehhashi labo, uMinister, abanikazi bale njomane echayiswe seyiphume endaweni yesibili ngoba isolwa ngokuthi iholobhile (ukugabavula kunokuba litelebhele) emtelebhelweni weDundee July, ebingoMgqibelo, eDundee.
UNkk Thandi Sima nomyeni wakhe, uMnu Dumisani Sima baseZingolweni, bakhale ngoMnu Mdubane Gama weKwaZulu-Natal Rural Horse Riding Association, obamukela imiphumela emajajini bese iyamenyezelwa, basola yena ngokukhipha leli hhashi emqhudelwaneni ngenxa yokuthola umbiko emajajini othi liholobhile.
Ngenxa yomthetho walo mtelebhelo osemakhaya, kakuvumelike ukuthi ihhashi liholobhe. Amajaji asuke ehamba phansi, elandela amahhashi uma esasuka eze eyoshaya intambo, bese ekhipha imiphumela.
Uma kunehhashi elephule lo mthetho, ngisho liphumelele, liyakhishwa. Lo mtelebhelo usuke uxhashwe yi-Amathole Funeral Services lapho ihhashi elinqobile limuka no-R100 000 elesibili lihambe no-R70 000 bese kuthi elesithathu linikezwe u-R35 000.
Endaweni kaMinister kume- nyezelwe iNxakanxaka eyokuqala kube nguSchomane, elilale isithathu kwaba uSgwebosentambo. AbakwaSima bebethukuthele begane unwabu ngokukhishwa kwehhashi labo.
Bangene ngaphakathi enku- ndleni beyokhononda ngalokhu. UNkk Sima ubechapha uMnu Gama ngenhlamba, emkhomba ngeminwe emsola ngokuba nesandla ekukhishweni kukaMinister.
“Kwenzeke kanjani ukuthi kukhishwe ihhashi lethu ngaphandle kokukhombisa ubufakazi obugcwele ngalokhu abalisola ngakho? Kaseneme neze ngale nto eyenziwe nguGama.
“Besihlale sizwa vele ukuthi unenzondo ngala mahhashi okungawona awala eNingizimu Afrika, kuke kwaba nemihlangano lapho ayesho khona ukuthi akawafuni la mahhashi.
“Umthetho siyawazi, udaba sizoluyisa enkantolo,” kusho uNkk Sima. UMnu Gama uthe yena akahlangani nemiphumela, akwenzayo nje wamukela umbiko wamajaji.
“Mina ngamukela lokhu engisuke senginikezwe khona ngamajaji. Amajaji ayekhona nangonyaka odlule futhi anolwazi lwalo mse- benzi, kawacheme namuntu futhi yiwona asuke ehamba ngemoto elandela lo mtelebhelo,” kusho uMnu Gama.
Uthe uma abakwaSima bemyisa enkantolo, akaboni ukuthi uzobe eyokwenzani lapho ngoba akenze lutho. Ngendaba yezinsolo zokuthi uke waba nezinkulumo ezinenzondo ngohlobo lwamahhashi akwamanye amazwe - abizwa nge-pure breed, uthe:
“Kangikwazi lokho, mina ngazi ukuthi ukulethwa kwalolu hlobo kwakuhloswe ukuthi kuzonyuswa umgangatho wokudlala kwamahhashi. Ahlungwa wumnyango wezemidlalo ukuba adlale wodwa ngenxa yezinga akulona.” kusho uMnu uGama.
Kwenzeke kanjani ukuthi kukhishelwe ihhashi lethu ngaphandle...