Iyalawuleka i-lupus
KUBALULEKILE ukuba sifundisane ngezifo ezijwayelekile emphakathini futhi sinikezane ngolwazi mayelana nezinto esingazenza ukuvikela ukuba singajwayelwa yizifo.
Emasontweni edlule sifunde ezindabeni ngokudlula emhlabeni kukaNhlakanipho Zuma, oyindodana kobengumengameli wezwe uMnu Jacob Zuma. Kubalulwe isifo selupus njengembangela yokushona kukaNhlakanipho. Mhlawumbe baningi abafisa ukwazi ukuthi ngabe siyini lesi sifo. Ake sithathe ithuba sicobelane ngolwazi mayelana nalesi sifo.
Ngabe iyini i-lupus?
Igama elithi lupus ngelesintaliyane elichaza inkentshane. Kudala, lesi sifo besibonakala ngokushintsha kwesikhumba ebusweni, ikakhulukazi ngasekhaleni. Bekuba sengathi ulunywe yinkentshane, kodwa-ke abantu abaningi manje bachaza lezi zimpawu njengoshintsho lwesikhumba, kube nebala elifana nesiphaphalazi ebusweni ( butterfly rash).
Lesi-ke yisifo esiyimbelesela. Izimpawu zaso zihlala isikhathi esingaphezu kwamaviki ayisithupha - kungaba yiminyaka, okanye impilo yomuntu yonke.
Ayaziwa imbangela yaso kodwa luningi ucwaningo olwenziwayo ngaso. I- lupus ihlasela ikakhulukazi abantu besimame abaneminyaka ewu-15 kuya ku-44 kodwa nabesilisa iyabahlasela.
Izimpawu zelupus ziyafika ngesinye isikhathi zikuxine kakhulu. Okwenzeka emzimbeni wukuba amasosha omzimba okumele ngabe avikela umzimba avele awuvukele, adle izitho zomzimba esikhundleni sokuba awuvikele emagciwaneni.
Kungathatha iminyaka ukuhlonza ukuthi umuntu uphethwe yilesifo. Lokhu kubangwa ukuthi ayikho indlela eyodwa yokuhlola lesi sifo. I- lupus ayilapheki kodwa imithi iyakwazi ukuthiba izimpawu zayo.
Kunezinhlobo ezahlukahlukene ze- lupus. Kukhona i- SLE, Cutaneous Lupus, Drug induced Lupus ne- Neonatal Lupus. I- lupus ize ihlasele ngisho nezinye izitho zomzimba ngaphandle kwesikhumba, singabala lana izinso, ingqondo, inhliziyo, amaphaphu, igazi kanye namalunga omzimba. Iningi labantu abane- lupus baba nesifo sezinso. Kodwa esikhathini samanje iningi labantu abane- lupus bayaphila isikhathi eside uma ngabe lesi sifo silawulekile.
Ukulawula lesi sifo, akhona amaphilisi asetshenziswayo, kodwa i- lupus ivamise ukulawulwa ngodokotela abaningi abaqeqeshwe ngizindlela ezahlukahlukene - kungaba ngodokotela bamathambo, odokotela benhliziyo, amaphaphu njalo njalo. Kuba ngodokotela abehlukahlukene abasebenza ngokubambisana ukulawula lesi sifo.
Izimpawu ongaziqaphela ze-lupus
I- rash, wushintso esikhumbeni ikakhulukazi ebusweni, ezingalweni noma ezithweni. Ngike ngayichaza nje i- rash esezihlathini, ekake ikhala engathi isiphaphalazi ( butterfly rash).
Izimpawu zibhebhethekiswa nayilanga. Ubuhlungu bamalunga nokuvuvukala kwawo. Ukukhathala okungajwayelekile. Ukushintsha kwezinzwani zibande futhi zibe luhlaza okwesikhashana ziphinde zilunge.
Engingakusho nje ukuthi kumele siziqaphele lezi zimpawu. Uma ngabe kukhona okusolayo xhumana nodokotela wakho noma umtholampilo oseduze.
Uma unombuzo noma ufisa sikhulume ngesifo esithile ungakhohlwa ukusithinta ukuze sikunike ulwazi oluseqophelweni eliphezulu.