UBHOKODE INTOMBI ENGAFUNI UKWALIWA
UBHOKODE intombi ngomkhonto amanxeba awu-8 ngoMgqibelo ebusuku, maqede wawushiya esifubeni sayo ngoba engafuni ukwaliwa owesilisa waseZibomvu, eDumbe.
Kunzima ngisho ukukhuluma emalungwini omndeni kaNkz Ntando Nkosi (23) avuke ekuseni izolo ngeSonto azithela phezu kwesidumbu sendodakazi yawo sinomkhonto esifubeni.
Ngokuthola kweLANGA ngonina kamufi, uNkz Popy Mbatha - obekunzima ngisho ukuba akhulume ocingweni ngesikhathi elandisa leli phephandaba - bekuyizithuba zo20h00 ngoMgqibelo eselungiselela ukuyolala ngesikhathi kufika lona wesilisa obeyisoka lendodakazi yakhe.
Uthi umnyango uvulwe nguyena ngesikhathi lona wesilisa egqongqoza kanti akazi ukuthi useyibizela ukufa.
“Lingibingelele kahle njengenjwayelo (isoka), kungekho lutho olusolisayo ukuthi kukhona okungahambi kahle. Licele ukuba ngilibizele uNtando. Ngimbizile baphumela ngaphandle kwesango bayoxoxela khona, ngahamba ngayolala.
“Ngesikhathi uNtando ephuma endlini ubephethe uplastiki obunezimpahla zalo isoka lakhe, engikholwa wukuthi ubeyolinika wona. Yisoka lakhe esilaziyo sonke ekhaya ngoba sebenesikhathi bethandana futhi belijwayele ukufika livakashe lapha ekhaya kungekho nkinga,” kusho uNkz Mbatha.
Uqhube wathi ngesikhathi eyolala, uzwile ukuthi bakhulumela phezulu sengathi bayaxabana, kodwa wanganaka ngoba akathandi ukungena ezindabeni zezingane.
Uthi ubezitshela ukuthi uzoyibuza uma isibuya indodakazi yakhe ukuthi ibibangani nesoka layo. Uqhuba uthi uze wazumeka engabonanga ukuthi ingcine ibuyile yini indodakazi yakhe ekhaya.
“Ekuseni sivuke sazithela phezu kwesidumbu sayo esangweni lomuzi, sinomkhonto esifubeni. Eceleni kwesidumbu bekukhona wona lo pulastiki ephume iwuphethe nomakhalekhukhwini,” kusho uNkz Mbatha.
Uthi indodakazi yakhe ibisihlukene nalona wesilisa, bahlukane ekuqaleni kwale nyanga, kodwa umlisa ubengafuni ukwamukela ukuthi ucu kalusahlangani. Uveze ukuthi akayazi imbangela yokuhlukana kwabo.
Uthi sesitholakale isidumbu ekuseni, umsolwa ufonele indodana yakhe ngenombolo efihliwe eyibuza ukuthi kwenzekani kubo, maqede wavala ucingo. Uthi liphinde lafona ngenombolo okukholakala ukuthi ngekayise, labuza ukuthi kwenzenjani kwaphithizela abantu egcekeni. Kuthe uma liphoswa imibuzo laluvala ucingo lingaphendulanga.
UNkz Mbatha uthi amanxeba abegcwele ebusweni nasemzimbeni, okukhomba ukuthi umsolwa ubekuhlosile ukubulala indodakazi yakhe.
Uthi ngesikhathi umsolwa efika kwakhe - ecela indodakazi yakhe - ubengaphethe lutho, uyasola ukuthi lo mkhonto ubewufihle emotweni abehamba ngayo.
“Lo mfana ubebukeka eyingane elungile futhi ehloniphayo, besingamcabangeli ukuthi angenza into efana nale endodakazini yami,” kusho uNkz Mbatha.
Uveze ukuthi indodakazi yakhe ibiyenza unyaka wesibili ifundela ukuba nguthisha. Ishiye emhlabeni ingane eneminyaka emine.
ILANGA lithole ukuthi umsolwa uyindodana yomhloli wezemfundo owaziwayo eDumbe.
Okhulumela amaphoyisa KwaZulu-Natal, uCol Thembeka Mbhele, uthi kuvulwe icala lokubulala, umsolwa ubengakaboshwa amaphoyisa athungatha umkhondo wakhe.