Kufezeke iphupho kumlingisi weMbewu
UGugu uthi kubalulekile ukuzithuthukisa ngolwazi kule mboni
IBONA kubalulekile ukuhlale ufuna ulwazi uma ukwezikaqedisizungu intokazi elingisa emdlalweni ongene ngesivinini kubathandi bemidlalo ewuchungechunge kumabonakude, iMbewu: The Seed.
Lo mdlalo ukhonjiswa ngo21h30 kusukela ngoMsombuluko kuya kuLwesihlanu ku-e.tv. UGugu Mzobe (osesithombeni) odlala indawo kaNomusa onguweta wase-Emsamo kulo mdlalo, uthi ngenxa yokuthi into eyithalente ihamba ithande “ukugqwala”, kubalulekile ukuba umuntu ahlale efuna ulwazi oluzokwenza angehlelwa yizinga.
Le ntokazi yaKwaMashu iqale ukuzihlanganisa nezikaqedisizungu ineminyaka ewu-11 ubudala, esikoleni samaciko, iK-Cap kaEdmund Mhlongo. Ithi kulokho kufuna ulwazi, kubalulekile nokuba umuntu athole isicucu semfundo futhi osenaso kakusho ukuthi ame, makaqhubeke nemfundo. Yona ineziqu ezithole eWits University nesitifiketi sePerforming Arts esithole e-K-Cap.
Yize uGugu engumlingisi futhi eyintokazi yaselokishini, kodwa uma ekhuluma nabantu abadala kunaye, ukhombisa ukubahlonipha njengoba engxoxweni yakhe neLANGA, ubengalingi agaklaze amagama ozakwabo abadala kunaye - ubebabiza ngomam’ Leleti (Khumalo) odlala indawo kaMaZulu oyinkosikazi kaZimele Bhengu (Mpumelelo Bulose), ubhuti Mpumelelo, umam’ Thembi (Mtshali) odlala indawo kaMaNdlovu ongunina kaZimele - njalo njalo.
“Kubalulekile ukusebenza kanzima uma ukule ndima futhi ubekezele. Kumele ufunde, wenze amakhozi amafushane kwazise ngisho isitifiketi esincane nje (semfundo) sisho lukhulu.
"Ukulingisa, angithi nje yinto eyithalente ihamba igqwale, ngakho-ke kuyasiza ukuhlale uyilekelela ngemfu- ndo nokuthola ulwazi olusha. Okungisizayo mina wukuthi abantu engibukela kubona baseduze. Ngibukela kumam’ Leleti, usisi Brenda Mhlongo, umam’ Thembi.
"Ngiphinde ngibe nabangani-ke kulo mkhakha esisizanayo nabo kakhulu,” kusho le ntokazi esibuya emazweni aphesheya - okubalwa kuwona neFrance - ngawo umsebenzi wokulingisa.
Ithi kwabanye babangani bayo egqugquzelana nabo kulo mkhakha, nguSamke Mkhize odlala indawo kaMabuyi kwiSibaya, noNtokozo Mzulwini odlala indawo kaLindiwe kwiMbewu.
UGugu uthi esikhathini esizayo uzibona ekhula yena njengoGugu futhi ufisa ukuba umlingiswa wakhe (uNomusa) akhule kwiMbewu. “Ngifisa ukuba uNomusa akhule. Kuthi uma kukhulunywa kuthiwe yile ntombazane eyayizizamela inguweta Emsamo kodwa esikhulile, isiseMaluju Oil (okuyinkampani enkulu kulo mdlalo).
"Ngizizwa ngithobekile ngokusebenza nabantu okubalwa kubona umam’ Leleti, umam’ Thembi, ubhuti Mpumelelo ngisho nobab’ (Duma) Ndlovu (ongumsunguli walo mdlalo). Empeleni nje, kufana nokufezeka kwephupho lami ukuba kwiMbewu kwazise ngikhumbula ngiseseK-Cap, ubaba uNdlovu wake wafika khona, ngamtshela ukuthi ngiyafisa ukusebenza naye ngelinye ilanga,” kusho le ntokazi. Ithi bese siside isikhathi izama inhlanhla emidlalweni kamabonakude kodwa kungalungi, nokho itshele ILANGA ukuthi lokho kakuyidikibalisanga kwazise ibisebenza ngokuzinikela. Ngaphandle kokuba ngumlingisi, uGugu ungumdansi oseqophelweni eliphezulu futhi ungumbhali njengoba engomunye wababhali abahlanganise incwadi yezindaba ezimfushane, ethi “Slices of France and South Africa”. Udlale emidlalweni eminingi yeshashalazi yaseK-Cap, okubalwa kuyona iChief Albert Luthuli Musical, iBayede Shaka, iMadam President, iHow Long neJohny Makhathini. Utshele ILANGA ukuthi wesekwa kakhulu wumndeni wakhe kanti nabantu bangakubo bakhombisa ukumeseka futhi bayamjabulela ngempumelelo yakhe.