Iphoyisa lizibulale kade "liyokhendla"
Lihambe ngemoto yomsebenzi lingayicelile
KUSOLWA ukuthi belisendleleni liyokhendla enyangeni yaKwaNongoma iphoyisa elishayise izinkomo ezintathu zafa, lalimaza imoto yomsebenzi ebeliyithathe lingayicelile kubaphathi balo, maqede lazingqokloza ngesibhamu somsebenzi lashona.
Kubikwa ukuthi uConst Khayelihle Gwala (32) ( osesithombeni), wasoNdini, obesebenzela esiteshini saseBabanango, ubengena ebusuku ngoLwesihlanu wabe esethatha imoto yomsebenzi wayikhomba KwaNongoma ehamba nomngani wakhe ongelona iphoyisa.
Kuthiwa wehlelwa yile ngozi nje, abaphathi bakhe bebengazi ukuthi usethathe imoto waya kude kanje. Kuvela ukuthi ingozi ibehlele sebeseMahlabathini - okuyibanga elilinganiselwa ku50km ukuba bafike KwaNongoma.
Ngokuthola kweLANGA ngemithombo yalo esondelene noConst Gwala, wehlelwa yileli shobolo nje, kunelinye icala elifuze leli lemoto alenza esasebenza esiteshini saseNgome (KwaNongoma), okuthiwa ubesahamba lona.
Kuthiwa ngemuva kokuba sekwenzeke le ngozi, kufike amaphoyisa asesiteshini saseMahlabathini okuyiwona avule icala adonsa nemoto uConst Gwala abehamba ngayo.
Ngesikhathi esehamba amaphoyisa, kuthiwa amshiye endaweni yesigameko nomngani wakhe, batshela amaphoyisa ukuthi mawakhululeke ngoba ikhona imoto esuka esiteshini sakhe eBabanango ezomlanda.
Kuthiwa kunele kwahamba amaphoyisa, uConst Gwala wakhipha isibhamu somsebenzi wasifaka emlonyeni, wazidubula washonela khona lapho.
Imithombo yeLANGA engaphakathi emaphoyiseni, iveze ukuthi uConst Gwala uke waba nokungaziphathi kahle emsebenzini, ehlupha ngokuzithathela izimoto zomsebenzi engazicelile aze azishayise.
Kuthiwa kwenzeka lokhu nje ubeseshintshe kakhulu, eseziphethe kahle emsebenzini.
“Siyabona ukuthi into emenze waze wanquma ukuzibulala wukuthi ubebona ukuthi selimla- ndele kakhulu ishobolo lokushayisa izimoto zomsebenzi. Kunokwenzeka ukuthi ubesesaba ukuthi uzophelelwa wumsebenzi ngaleli cala, wakhetha ukuzibulala,” kusho umthombo.
UMnu Muzi Gwala, ongumalume kamufi, ukuqinisekisile ukuthi umshana wakhe uzibulele ngemuva kokudala ingozi ehamba ngemoto yomsebenzi.
“Kuyiqiniso ukuthi ingozi yenzekile, mina ngizifikele mathupha endaweni yesigameko umshana wami eseshonile. Esikutholile siwumndeni wukuthi imoto abehamba ngayo ibingagunyaziwe ukuthi ibesendaweni eyenze kuyona ingozi.
“Okusiphathe kabi kakhulu siwumndeni wukuthi amaphoyisa abeyomsiza endaweni yesigameko, amshiye nesibhamu somsebenzi esigangeni ekubeni ubesenze ingozi efana nale.
“Bekumele asithathe isibhamu ngoba kuyacaca ukuthi emuva kwengozi ubengasekho esimeni esihle,” kusho uMnu Gwala.
Mayelana nezinsolo zokuthi uConst Gwala ubeyokhendla, uthe akanalo ulwazi ukuthi ubeyaphi. Uthe abantu abangaba nolwazi ngamaphoyisa aseMahlabathini ngoba yiwona akhulume naye athatha nesitatimende.
Okhulumela amaphoyisa KwaZulu-Natal, uCol Thembeka Mbhele, usiqinisekisile lesi sigameko wathi kuvulwe idokodo ngokushona kwephoyisa.