Ungqongqiswe ngamathayi osolwa ngokubulala
Umufi akabuyanga esikoleni
USHAYWE wabulawa maqede wagaxwa amathayi entanyeni, wokhelwa ngomlilo owesilisa waseMacekane, eMpangeni, obesolwa ngokubulala intombazane isidumbu sayo esitholwe ngoLwesithathu olwedlule emuva kokuba inyamalale ngoMsombuluko.
UMnu Lindokuhle Mthembu (23), obesolwa ngokubulala uSphelele Mbatha (23), kuthiwa ubesegcwele izinkalo ebaleka, njengoba umphakathi uze wamthola ngabo-18h00 ngoLwesihlanu eMatshana, khona eMpangeni.
Ngesikhathi etholakala, umphakathi umthelekele ngenduku waze washona, wamgaxa amathayi wamshisa wangqongqa.
Kuzokhumbuleka ukuthi ngoLwesine ILANGA libikile ngokubulawa kukaSphelele, okuthiwa uklinywe ngothayi.
Kuthiwe ubephume kubo ethi uya esikoleni , eQhamuka High, kodwa wangabuya. Kuthiwa umsolwa wone ngokushiya ophaqa bakhe endaweni yesigameko kwase kusetshenziswa bona ukulandela umkhondo.
UMnu uSipho Ntombela oyikhansela ku-ward 31 ngaphansi kukaMasipala uMhlathuze, uthe: “Ngifike kanye namaphoyisa esevutha (umsolwa). Umphakathi umthole eMatshana lapho abebalekele khona njengoba ebefunwa usuku lonke.”
Uthi umsolwa ugcwale amathafa emuva kokusolakala ukuthi nguyena ogile lo mkhuba. Uthayi okuthiwa usetshenziswe ukuklinya uSphelele umnyama, ngowakwesinye isikole esingasedolobheni eMpangeni kanti owaseQhamuka ubomvu.
Kulo muzi okuhlala kuwona umsolwa, kunomfanyana ofunda kulesi sikole sothayi omnyama, okhale ngokuthi umdukele kade wawugcina.
Okhulumela amaphoyisa aseMpangeni, uCapt uMbongeni Mdlalose, uthe umsolwa ubanjwe wumphakathi wamshaya waze wafa.
“Amaphoyisa asevule icala lokubulala, uphenyo luyaqhubeka. Uma umuntu ebulewe wumphakathi kakulula ukuba kuboshwe bonke abantu endaweni, kodwa lowo ozogcina etholakala ukuba abekwe icala. Lokho kuzokwenzeka njengoba amaphoyisa eqhubeka nophenyo,” kusho uCapt Mdlalose.