KUBONWA NGOKUSA EPHOYISENI "ELIBULALE" UMNGANI WALO
LIKHALE ngokuthi lesaba ijele iphoyisa elisolwa ngokudubula libulale umngani walo lithi liyamdlalisa, maqede labhekisa isibhamu kulona lazidubula.
ILANGA lithole ukuthi uConst Scelo Gumede waKwaVilane, KwaNongoma, uphume emsebenzini ngoMgqibelo ekuseni wayohlangana nabangani bakhe esafake umfaniswano wamaphoyisa, ephethe nesibhamu.
Kuthiwa ubafice bezicima ngeziphuzo ezikhala kahle, naye wabajoyina.
Kubikwa ukuthi ubencokola nabangani wabe esekhipha isibhamu edlalisa omunye wabo, uMnu Vusimuzi Sibiya (38) kanti uzodubuleka ngempela ashone.
Kuthiwa ukhiphe isibhamu enganakile ukuthi ugcine esikhokhile - inhlamvu ihleli phezulu - wadubula. Umngani wakhe ushonele khona lapho.
Kuthiwa uConst Gumede unele wabona ukuthi usenze umonakalo ongaka, washaywa wuvalo ekhala ngokuthi uyalesaba ijele, maqede wathatha isibhamu wasibhekisa kuyena wazidubula ekhanda kodwa wangashona, waphuthunyiswa esibhedlela.
Kubikwa ukuthi isimo sakhe sibi kakhulu esibhedlela, uphefumula ngemishini.
Ngokomthombo waleli phephandaba, obukhona ngesikhathi kwenzeka lesi sigameko - kodwa ocele ukuba singalidaluli igama lawo - uthi: “Bonke ubumnandi bokujabulela izidlo ebesiziphuza, buphele ngaleso sikhathi sekwenzeke le nto, naye uGumede esetatazela esaba ukuthi uzoboshwa.
“Ngesikhathi sizama ukusiza umngani wakhe, sizwe sekuqhuma isibhamu okwesibili, sathi uma sibheka sathola ukuthi nguyena uyazidubula,” usho kanje umthombo.
Okhulumela amaphoyisa, uCol Thembeka Mbhele, uthi kuvulwe amacala amabili, elokubulala nelokuzama ukubulala, amaphoyisa asaphenya.