BAGQUGQUZELA UKUSOKA
UMSAKAZI woKhozi FM, uKhathide “Tshathugodo” Ngobe, uthi inkinga ayenayo uma echama ngesikhathi esemncane, yiyona eyenza ukuba asheshe asoke.
Lokhu ukusho ngesikhathi kwethulwa ngokusemthethweni i- video yengoma kaKhuzani "iNdlamlenze” Mpungose, ethi “Soka Ndoda” ngoLwesihlanu kwaMax Lifestyle, eMlazi.
Inhloso yale ngoma kaKhuzani oyinxusa lenhlangano iCMT Soka, wukugqugquzela abantu ukuba bayosoka ngenhloso yokulwa nesandulela-ngculaza nezinye izifo ezithathelana ngokocansi.
Engomeni uKhuzani uhambisana noSiyabonga Mpungose, ohaya izinkondlo. Kulo mcimbi uTshatha uyale amadoda ukuba asebenzise leli thuba ayosoka ukuze aphephe ezifweni ezithathelanayo.
“Mina ngaba nenhlanhla ngasheshe ngasokwa ngenxa yokunsonsotha okwakuba khona uma ngichama ngiseyingane.
"Ngikhule ngiyihlaya ebafaneni bangakithi uma siyobhukuda esizibeni kuthiwe ngikhubazekile, kukhonjiswana ngomphambili wami. Kuthe uma sesikhula, ingcabha yasala nabo ngoba bese kufanele bahambe bayosoka esibhedlela,” kusho uTshatha.
Umsakazi weGagasi 99.5 FM, uDJ Vumar, naye akasalanga ngaphandle, uthe usoke ngonyaka odlule. “Ekhaya siwumndeni wamasiko, kunezibongo ezingakholelwa ekutheni kwenziwe noma yini emzimbeni womuntu.
"Ngenxa yokuthola izeluleko nokubona ukubaluleka kwempilo, ngibe sengizijuba ngayosoka. Ngibone omkhulu umehluko empilweni yami,” kusho uDJ Vumar. I-CMT Soka, inesifiso sokuba kushaye u-2020 sebewu-2 million abesilisa asebesokile.
Kulo mcimbi bekukhona noMntwana wasendlunkulu kaZulu, uNhlanganiso othe kumjabulisa kakhulu ukuba yingxenye yabantu abashumayela ivangeli lokuba kusokwe.
“Ukusoka kubalulekile kakhu- lu, kuyasiza ekutheni kulwiwe nezifo ezithathelana ngocansi lezi eseziqede abantu. Abantu mabahambe bayosoka,” kusho uMntwana uNhlanganiso.
UKhuzani uthe uqophe ingoma ethi "Soka Ndoda" ngoba efuna ukuthi ngisho nalapho engakwazi ukufinyelela khona, le ngoma ifinyelele ngokudlalwa emisakazweni nakomabonakude. “Kungijabulisa kakhulu ukuba ngumculi kamaskandi oqokwe ukuba enze lo msebenzi wokuqopha le ngoma.
"Ngaphandle kwalokhu, kuningi esengikwenzile ukuzama ukusiza emphakathini, okubalwa nokulekelela abafundi ngemfundo yabo ephakeme, ikakhulukazi abasemakhaya abeswele,” kusho uKhuzani.