Umlingisi ucishe washa nomkakhe
Bebesuka eGoli beya emcimbini oseThekwini
UCISHE waphenduka umlotha nenkosikazi yakhe, uBonginkosi Shibe, ozakhele igama edlala indawo kaFologo kwiGreed and Desire ebidlala kuMzansi Magic, ibophele abalingisi okubalwa kubona uNthati Moshesh, uMotsoaledi Setumo, uThato Mulamu noLinda Sebezo.
UShibe uthi imoto abehamba ngayo esuka eGoli ephikelele emcimbini wokukhumelana umlotha phakathi kwezigodi ezili-8 ebezilwa phambilini ngakubo eMehlomnyama, ePort Shepstone, ivele yagqamuka amalangabi.
Bekulindeleke ukuba abe yinxusa kulo mcimbi obusesizweni seNkosi Khanyile Cele ngoMgqibelo, kuhlatshwe izinkomo eziwu-10. Ekhuluma neLANGA uShibe, uthi nakuba bayakhuluma, basizwe wukuthi irobhothi livalile ukuze abone ukuthi kunentuthu ephuma kwibhonethi.
“Kuthe uma ngivula, ilangabi bese lizophumela ngaphezulu. Isigubhu esihlala amafutha namapayipi akhona bese kuqala ukuncibilika. Ngisizwe yisigubhu samanzi esiwu2lt ebengisiphethe, ngawabhunyela khona wonke.
"Ukube irobhothi kalivalanga, ngabe sifele kuyona nomkami. Isha nje, bengiqeda ukuyoyenza i- major service ngoba ngazi ukuthi ngizoba nohambo olude olubheke ekhaya,” kusho yena. Yize uShibe egcine engabonakalanga kulo mcimbi, kodwa wona uqhubekile njengoba bekulindelekile.
"Zonke izigodi ezingaphansi kobukhosi baKwaCele bezikhona. Kulezi zigodi okubalwa iNyamande, iMawuleni, iManonka, iNtengele, iMvozane, iNgwazini, iNtimbankulu iMabheleni neSunduzi. Isigodi ngasinye besipheke inkomo yaso, kufinywa ngendololwane.
Amabutho aqale ngokuhamba ayokwenza ihlambo emfuleni lapho izinsizwa bezigezana khona izandla. Kusukwe lapho kwayoshwelezwa, kutshelwa izinyanya ukuthi iphelile impi.
INkosi Cele ithe bekubalulekile ukuba lo mcimbi ubekhona ngoba kunabantu bendawo yayo abahamba bebalekela zona lezi zimpi ezenzeke eminyakeni ephakathi kuka-1975 kuya ku-1992.
“Obekungenzeka wukuba bagcine sebentshontshana ngoba besabambe okwakudala. Ngaphambi kokwenza lo mcimbi, bekusabeka nokuthi sidlale ndawonye ibhola ngoba besingazi ukuthi izingane zangapha uma ziya ngalena zizokwemukelwa kanjani.
"Sijabulile ukuthi umcimbi uhambe kahle, insizwa yesinye isigodi isingaqonywa kwesinye igcagcelwe ngoba kuyezwanwa. Kulabo abahamba bebalekela izimpi, sithi mababuye bazovusa amanxiwa abo ukuze nentuthuko ingene kahle sesibaningi,” kusho inkosi.