Umehlokaboni kozothola uSphesihle
SEKUKHISHWE umehlokaboni ka-R40 000 kongathola umkhondo kaSphesihle Dlamini oneminyaka (3) waseMandawe, olahleke ngoZibandlela (December) ngo-2017 esesontweni.
Le mali itholakale ngosizo lwabantu abebethinteka ngokubona kuFacebook udaba lokulahleka kwale ngane nangokusebenza kwabazali bayo begeza izimoto eHillcrest Aids Centre njalo ngoMgqibelo.
Ngokusho kukanina kaSphesihle, uNkz Thabsile Dlamini, sekuyisikhathi eside inyamalele indodakazi yakhe kodwa ngeke aze akuthole ukuphumula engayitholile.
“Nasebusuku ngiyaqwasha, akulaleki ngicabanga ukuthi kazi umntanami ukuphi futhi unakekelwa ngubani lapho ekhona njengoba bekungumntwana oneasthma. Uma kuwukuthi akasekho, sengingakujabulela ukuthola ithambo lakhe, ngazi ukuthi ngambeka kuphi.
“Izingubo zakhe sengaze ngazifihla ngoba njalo uma ngizibona ngifikelwa yizinyembezi, ngicabanga ukuthi kazi uyafudumala yini la ekhona noma uqhuqhwa ngamakhaza. Inhliziyo yami kayisoze yakuthola ukuphumula ngingakamtholi," kusho uNkz Dlamini.
Echaza ngokwenzeke ngosuku lwesigameko, uthi bebevakashile enkonzweni ebikhona endaweni. Kucelwe abaqalayo ukufika ukuba baye ngaphambili.
Naye-ke uNkz Dlamini nodadewabo basukumile baya phambili, ingane bayishiya ihleli nezinye ngemuva. Bebuya epulipiti, ibingasabonwa nangokhalo. Uma bebuza ebantwini abebehleli eduze kwalapho beyishiye khona, bathe iphumile nezinye. Bayifune baze bagoduka bengayitholi.
“Kangikholwa ukuthi le ngane yayingaphuma nezinye, uma sezingena ngaphakathi ingabe isabuya, ngendlela ehlakaniphe ngayo. Ngisho kuthiwa iphume ngesango izama ukubuyela ekhaya, uma ihlangana nabantu emgwaqweni ibizosho ukuthi isuka kuphi ngoba ibikwazi uku- khuluma, amagama ethu iwazi," kusho uNkz Dlamini.
Amaphoyisa asethathe ngisho amagazi ethu sinoyise kwayohlolwa ulibobuzo ngoba ethi uma kukhona okuvelayo azomesha igazi bese esithinta. Kusho ukuthi akukaveli lutho njengoba esathule namanje.
Okhulumela amaphoyisa KwaZulu-Natal, uLt Colonel Zwane, uthi namanje basaluphenya udaba lokulahleka kukaSphesihle, bacela noma ngubani ongaba nolwazi athintane namaphoyisa aseduzane.