Amadoda agqugquzelwa ukusungula okokuzithuthukisa
KUGQUGQUZELWE amadoda ngokuba ayeke ukuziphathisa okwezilwane, avikele imindeni yawo ukuze kwakheke isizwe esinokuthula nesifundisekile.
Lokhu kwenziwe yiMeya yasoLundi, uMnu Wilson Ntshangase, engqungqutheleni yokucotshelelwa ngolwazi kwabesilisa ebihlelwe wuMasipala wasoNdini ngoLwesihlanu.
UMnu Ntshangase uthe kubalulekile ukuba amadoda akhumbule ukuthi angobani, ayeke ukwenza izinto ezihlambalaza abantu besifazane.
Ngalo uLwesihlanu, abesilisa basoNdini baqale ngemashi edolobheni lonke belwela amalungelo abo. “Kumele sibambe iqhaza ekwakheni isizwe sakithi, sidinga abesilisa abaqotho abanakekela imindeni yabo.
"Akafuneki ubaba oyisidlova emzini wakhe. Kulihlazo ukuba indoda ihlasele umndeni wayo ngoba umuntu wesilisa nguyena owokuqala ofika emqondweni wowesifazane uma kumele avikelwe.
"Kulihlazo-ke uma kunamadoda ehluleka wukuziphatha kahle bese edlwengula nezingane ezibulala. Isizwe sizophephela kubani uma abavikeli kuyibona abazophenduka amabhubesi?” kusho uMnu Ntshangase.
Ugqugquzele abesilisa ukuba basungule izinhlangano ezizoxhaswa wumasipala ukuze baphilise imindeni yabo.
Uthe izinhlangano eziningi abazixhasayo zigcwele abantu besifazane.
“Aphi amadoda aqotho azimisele ngokondla imindeni yawo? Inkululeko kuleli lizwe siyithole ngo-1994, ngakho-ke kubalulekile ukuba sonke sithuthukise umnotho wakuleli. Ukuvula kwenu amabhizinisi nezinhlangano ezizokwakha isizwe, kungasilekelela sonke, “kusho uMnu Ntshangase.
Amadoda ahambise incwadi yezikhalo esiteshini samaphoyisa khona oNdini, athi kuningi nawo okuwahlukumezayo okwenziwa ngabesifazane. Kokunye okuveziwe, wukuthi agcina esesebenzisa izikhuthazi zocansi ngenxa yokuthi abesifazane balufuna ngenkani ucansi bangabi nandaba nokuthi amadoda akhathele, abesuka emsebenzini.
Aveze nokuthi okunye okudla lubi, yisibhaxu nokungahlonipheki. UMnu Smile Khanyile, oyilungu lomphakathi, unxuse amadoda ukuba azihloniphe, abuyise nesithunzi sawo.
Uthe kuzona zonke izinkinga ezikhona emindenini, kumele nezingane zimbandakanywe uma sekuthathwa izinqumo ukuze zizofunda impilo zisencane.
Imenenja kamasipala, uMnu Nkosenye Zulu, ithe uhlu lwezikhalo oluhanjiswe ngabesilisa emaphoyiseni, lukhombisa ngoku- sobala ukuthi ziningi izingqinamba ezibhekene nabo. “Amadoda ayasho ukuthi mawakhulekiswe kakhulu ukuze nawo kubonakale ukubaluleka kwawo,” kusho uMnu Zulu.
Kule ngqungquthela bekumenywe namaphoyisa ukuba acije amadoda. Amaphoyisa athe amacala egazi kawathethwa phansi kwezihlahla, kumele athintwe uma kukhona okungahambi kahle ngisho ngabe nabesifazane bahlukumeza amadoda.
Kunxuswe amadoda ukuba angakuvumeli ukuba izingane zihlale zodwa emakhaya ukuze kunciphe izinga lobugebengu.
UMnu Tholinhlanhla Dube, wenhlangano ebizwa ngeMbenge, uthe indoda yayidalelwe ukuba ithwale kanzima, kodwa inkosikazi kayihlukunyezwa. Uthe baxhumanile nomasipala baphakamisa ukuba mayenziwe le mashi ukuze nabo abesilisa kugujwe ngendlela efanele ukubaluleka kwabo.
“Amadoda asalela emuva ngaso sonke isikhathi, akuqhakanjiswa nokuhle akwenzayo. Sifuna ukubonakala uma senza okuhle. Asihambisani nhlobo nokuhlukunyezwa kwezingane nabesifazane” kusho uMnu Dube.