Unconywe ngobuqotho uBV
Kuthiwa ume ne-IFP kwaba sekugcineni yize amanye amaqembu abemeshela nangemali
UMENGAMELI we-Inkatha Freedom Party (IFP), iNkosi Mangosuthu Buthelezi, ithi uMnu Senzo Mchunu obengundunankulu waKwaZulu-Natal, uxoshelwe ukuba qotho kulesi sikhundla - okumanje siphethwe nguMnu Willies Mchunu.
Ukusho lokhu ethula inkulumo emngcwabeni welungu eliqavile le-lFP, uDkt Bhekisisa “BV” Mthethwa obengcwatshwa izolo ngeSonto KwaMbonambi, ngaseMpangeni.
UMntwana uthe ubuyelwe yithemba uma ebona kufakwa uMnu Mchunu kwesokuba yilungu lesigungu esiphezulu se-African National Congress (ANC) ngoba uzobabheka abantu baleli bangazenzeli umathanda.
“Into engiyithanda ngawe wukuthi uqotho, kawuyifuni inkohlakalo. Uqhubeke njalo usebenzele isizwe ngobuqotho kuze kube inkosi iyakuthatha emhlabeni njengoba kwenzekile kuDkt Mthethwa obeqotho, wathembeka kwi-IFP kwaze kwaba sekugcineni.
"I-ANC kade yayimeshela uBV, okuthe uma esephuma esikhundleni sokuba yimeya yasoThungulu, yaqinisa ekufuneni ukuba abe yilungu layo, kodwa ngoba ubethembekile (kwi-IFP), wangakwenza lokho. Kwehlule ngisho sebemkhombisa izindodla zemali, wama neNkatha waze wafela kuyo.
"Bekuyindodana yami eqotho, ukwethembeka kwakhe kumakhele isidleke sothando enhliziyweni yami. Namanje ngilapha nje, beku- fanele ngikhethe ukuthi ngiza ngapha noma ngiya engqungqutheleni yengqubomgomo eqhubekayo eThekwini noma ngiya endlunkulu ngiyothokoza noBayede (iSilo uZwelithini kaBhekuzulu) njengoba isaqhubeka imigubho yosuku lwakhe lokuzalwa.
"Ngibone kufanele ngizokhala nomndeni njengoba silahlekelwe sonke ngokuhamba kukaDkt Mthethwa,” kusho iNkosi Buthelezi. Kule nkonzo kaDkt Mthethwa, zonke izikhulumi bezincoma ubuqotho, ukwethembeka nekhono ekuholeni isizwe, iqembu lakhe nebandla lamaNazaretha abekhonza kulo ohlangothini lwaseBuhleni, alisebenzele kwaze kwaba sekugcineni.
Lo mngcwabo - obuwethanyelwe yizinkumbi zabantu ebezigcwele itende elikhulukazi - ubugabe ngamahlaya njengoba besingahlali phansi isikhulumi abantu bengahlekanga. UMnu Mchunu uthi bazama behluleka ukweshela uDkt Mthethwa njengoba ulibofuzo lweNkatha belugijima phakathi ekujuleni kwemithambo yegazi lakhe.
“Ubukhuluma naye ashaye sengathi uyakuzwa, kodwa uyothi uqeda ukukhuluma sekufanele aphendule, angake nje ayiphendule leyo nto oyishoyo,” kusho uMnu Mchunu. Phakathi kwabaholi abavelele abebeyingxenye yalo mngcwabo, nguDkt Meshack Radebe oyisekela-somlomo esiShayamthetho saKwaZulu-Natal, uMfu Musa Zondi oke waba ngusihlalo we-IFP, uMntwana Mbonisi Zulu, yizimeya, amakhosi nabefundisi bebandla lamaNazaretha nabezinye izinkonzo.
UDkt Mthethwa ushiye amakhosikazi amathathu, uMaMbuyazi, uMaHlongwane noMaMjadu, indodana nabazukulu abathathu. Ubekwe endlini yokugcina emzini wakhe, waKwaBhekabezayo. Isidumbu sakhe sifakwe ebhokisini elikhethekile lendwangu elasungulwa nguyena.