Amalokishi ayazithuthukisa ngokwawo
BAKHUCULULA ilokishi ngokuhlela imicimbi esezingeni eliphezulu abadidiyeli bemicimbi muva nje, nabacacisa zisuka ukuthi izokwenzeka minyaka yonke.
Amalokishi amakhulu eThekwini njengoMlazi neKwaMashu, asenenqwaba yemicimbi emikhulukazi eqoqa yonke inhlobo yabaculi abasuke bedume ngaleso sikhathi nokuyinto ebingenzeki phambilini.
Owakamuva osematheni kubathandi bobumnandi nosanda kwethulwa, ngozoba mhla zizine eMenzi Sports Ground, kwa-N eMlazi obizwa ngeKasi Xperience.
Okuwenza ube sematheni ngabaculi abasohlwini kanti uzoba sezinkundleni zesikole esidume kakhulu, iMenzi High School. Omunye wabahleli, uMnu Mlungisi Mfaba, uthi banqume ukuphindela emalokishini manje ukugwema okuningi okubi bebe bethuthukisa nabantu basemakubo ngokunjalo nosomabhizinisi.
“Uyazi mfowethu izingozi esizigwema ngokuba abantu bayojabula ngasekhaya ziningi kabi. Ngeke bashayele izimoto amabanga amade baze badale izingozi noma bagcine ngokuboshwa.
"Nabazobe besebenza ngabantu bendawo njengoba nathi siqashe i- security company yakhona lapha elokishini.
"Lokhu kwenza kube lula ukuthobelana ngoba abantu abaningi bayazana. Nekhansela likhipha uhlu lwabantu abadinga imisebenzi bese siyabaqasha kuwo lo mcimbi njengoba abanye bezogada izimoto, abanye baqondise olayini njalo njalo.
"Kuningi nje esikuzuzayo ngokusondeza imicimbi emikhulu emalokishini,” kusho uMfaba obambisene noSphiwe noFanele bakwaHadebe ukuhlela lesi siphihli esibatshazwa nxa zonke.
Phakathi kwabazonandisa yiQueen of Gqom uBabes Wodumo, uMampintsha, Igcokama Elisha, uDanger, uDJ Boonu, uThukzin nabanye abangaphezu kwamashumi amabili.
Kwamathikithi bathi bafuna ukuzidayisela esangweni ukuze kungabi bikho mnotho ozocazwa nezinkampani ezifana no- computicket. Bathi bafuna wonke umnotho uphelele elokishini. Ngale kwenjabulo, kunohlelo lokuba osomabhizinisi bendawo badayise ngalolu suku ukuqinisekisa ukuthi kuhlomula uwonkewonke.