UMugabe ngeke amvotele uMnangagwa
ISABHIBHA inhliziyo kaMnu Robert Mugabe (94) oxoshwe kwesokuhola iqembu lakhe, iZimbabwe African National Union - Patriotic Front (Zanu-PF) neZimbawe ngoLwezi (November) njengoba izolo ngeSonto ememezele ukuthi ngeke amvotele umengameli walo omusha, uMnu Emmerson Mnangagwa (75) okhethweni olunamuhla ngoMsombuluko.
“Kuyaqala ukuthi sibe nabantu abaningi kangaka abafuna ukuvotelwa,” kusho uMnu Mugabe esemzini wakhe osenhlokodolobha, yaseZimbabwe, iHarare. “Ngeke ngibavotele labo abangenze isilo sengubo… ngizokhetha phakathi kwalaba abanye abawu-22 abafuna amavoti, wukuthi nje-ke nabo baningi kakhulu,” kusho uMnu Mugabe obekhuluma sakunensa kodwa ebukeka ewumqemane.
“Ngikhonjwe indlela eqenjini engazisungulela lona, bese ngibukwa njengesitha. Kwenzeka kanjani nje ngempela ukuba ngiphathiswe okwento engathi shu, ngiphathiswe okwesitha? Ngaketulwa, kawukwazi-ke ukuqhubeka nomsebenzi uma ungasenawo umbutho wezokuvikela,” kusho uMnu Mugabe.
Kuzokhumbuleka ukuthi uMnu Mugabe uphoqwe ukwesula ekuholeni iZanu-PF nezwe emuva kweminyaka ewu-37 eqhoqhobele lesi sikhundla. Ngesikhathi kwenzeka lokhu, kushaqeke abaningi kwazise amasosha - abaziwa kahle ukuthi amuzwa ekhaleni uMnu Mugabe - avele athatha izintambo zombuso azithi dinsi kuMnu Mnangagwa emuva kokuba uMnu Mugabe ezame ukudlulisela izintambo zokuhola iZanu-PF nokuhola izwe kumkakhe, uNkk Grace Mugabe (53).
Nokho izolo uMnu Mugabe uthe yinsambatheka nje indaba yokuthi yena ubefuna ukunika ngethileyi umkakhe amandla okuhola iqembu nezwe. Namuhla kuyasuka lokho ngokhetho eZimbabwe okuzobe kungokokuqala ngqa eminyakeni ewu-37 engekho uMnu Mugabe njengomuntu ofuna ukuvotelwa kwesokwengamela izwe.
UMnu Mnangagwa oke waba ngamathe nolimi noMnu Mugabe kwiZanu- PF, ubhekene noMnu Nelson Chamisa (40), weMovement for Democratic Change (MDC) kulolu khetho olubhekwe ngabomvu, kwazise kubhekwe ukuthi emuva kwalo, isimo sizokuba njani kuleliya lizwe eliqale ukuba nezinkinga kwezomnotho cishe eminyakeni ewu-19 edlule, emuva kokuba kuqalwe ukuthathwa komhlaba wabalimi abamhlophe ngaphandle kwesinxephezelo.
UMnu Mnangagwa - othembise izinguquko ezibalulekile ezweni lakhe uma enqoba - nguyena othishwa ukudla umhlanganiso njengoba esekwa kakhulu wumbutho wezempi, ngabezindaba abahambisana nombuso neqembu elibusayo okuyilona elibambe amatomu ezinsizeni zikahulumeni.
UMnu Chamisa, owenze kahle kakhulu emkhankasweni wakhe wokhetho, unethemba lokuthola ivoti lentsha ezobe ivotela ukushintsha kwezandla ekuphathweni kwezwe kwazise iZanuPF iphathe kusukela iZimbabwe ithole inkululeko. Leli lizwe lithole inkululeko ngo-1980 kade libuswa ngobukoloni yiBritain.
IZanu-PF isungulwe ngo-1987 emuva kokuhlangana kweZimbabwe African People’s Union (Zapu) kaMnu Joshua Nkomo neZanu kaMnu Mugabe. Iqale ukuhola ngo-1980 iyiZanu eyasungulwa nguMnu Enos Nkala, uMnu Ndabaningi Sithole, uMnu Edgar Tekere, uMnu Herbet Chitepo noMnu Leopold Takawiwa mhla ka-8 kuNcwaba (August) 1963. IZanu-PF isike yaba nezinkinga eziningi eziholele ekubeni inqwaba yezakhamizi igcine ibalekile eZimbabwe yagcwala emazweni angomakhelwane okubalwa kuwona iNingizimu Afrika, eyikhaya lezigidi zezakhamizi zakuleliya lizwe. Ngo-1999, iZanu-PF yehlelwe yisibalo samalungu kuxebuka uMnu Morgan Tsvangirai (ongasekho) esungula iMDC, okumanje iholwa nguMnu Chamisa.
Ngo-2008, kuxebuke amalungu aleli qembu, iningi lawo okungamaNdebele akwaBulawayo, avusa iZapu okumanje iholwa nguDumiso Dabengwa. Ebantwini abawu-23 abagaqele ukwengamela iZimbawe, bathathu abesifazane okunguThokozani Khuphe weMDCTsvangirai , uViolet Mariyasha we-United Democracy Movement (UDM), uJoice Mujuru wePeople’s Rainbow Coalition - oke waba ngamathe nolimi noMnu Mugabe - Melbah Dzepasi we#1980 Freedom Movement Zimbabwe.
IZimbabwe ngelinye lamazwe anomnotho osuhusha ngesisu ngenxa yezinqumo zikahulumeni wakhona usaphethwe nguMnu Mugabe. Nokho uMnu Mnangagwa emkhankasweni wakhe wokugcina wokhetho, obuseNational Sports Stadium, eHarare ngoMgqibelo, uthe usuyaxaxama umnotho njengoba usuke ku-2.7% ka-2017 waya ku-4.8%. Balindele ukuba kuphele unyaka usuku-6%. Umthombo ngabe-AFP Wikipedia.org.