Simagange ngeyePSL emuva kwezihibe
LIKHULU ixhala kubathandi bakanobhutshuzwayo baseNingizimu Afrika ngezinga ezoqala ngalo isizini entsha ye-Absa Premiership emuva kokuxazululeka komdonsiswano obukhona phakathi kwePremier Soccer League (PSL) ne-Ajax Cape Town. Isizathu salokho wukuthi i-Ajax ibikhomba ngenjumbane iligi, ithi iyigence ngezembe kungafanele. I-Ajax isolwa ngokudlalisa uTendai Ndoro obengumgadli wayo ngokungemthetho ngesizini edlule.
Iphule umthetho weFifa ephethe unobhutshuzwayo emhlabeni othi akufanele umdlali agijime emakilabhini amathathu ngesizini eyodwa. UNdoro udlalele i-Orlando Pirates, i-Al Faisal yaseSaudi Arabia ne-Ajax ngesizini edlule. Nokho i-Ajax ibisho amashushu ithi imsulwa yona, kangangoba ibisabisa ngokufaka isivimbelo senkantolo sokuba imidlalo yeligi ingaqali ngoMgqibelo ozayo.
Lugcine lugobike uphondo njengoba ngoLwesine inqume ukuhoxisa leli cala yabe isivuma ukuthi izoyihlonipha imidlalo yayo yeNational First Division kuze kube kufika isikhathi sokulalelwa kwesikhalo esifakile.
Ukuhoxa kwe-Ajax kusho ukuthi noma kanjani izoqala imidlalo yeligi njengoba bekuqinisekise uSihlalo wePSL, uDkt Irvin Khoza kweminye yemihlangano yesigungu esilawula le nhlangano.
Nakuba bekunovalo kodwa konke lokhu sekuphelile njengoba uzoqala umshikashika kubalandeli wokuklolodelana ngamakilabhu akuleli. Lokhu kuzokwenzeka emuva kokuba umqhudelwano weNdebe yoMhlaba yeFifa obuseRussia, usithibile isizungu kubathandi bebhola njengoba besebehlale begqolozele wona.
Njengoba kuqala imidlalo yeligi nje, kuningi okubhekwe ngabathandi bebhola. Okokuqala nje, wukuthi njengoba bekuneNdebe yoMhlaba, kukhona yini okufundwe ngabadlali bakuleli kula maqembu amazwe abedlala kulo mqhudelwano ogcine unqotshwe yiFrance. Ngendlela izinga ebeliphezulu ngayo kulo mqhudelwano womhlaba, cishe neligi yakuleli izothi ukunyuka kancane uma kuwukuthi abadlali bakuleli kukhona abakufundile base bekuzama ejimini.
Okumqoka kakhulu okubhekiwe, ngabadlali abasha abasayiniswe ngamakilabhu. Phela njalo uma kuqala isizini amakilabhu enza izinguquko, atheze izingwazi ezintsha. Kule midlalo yokuqala kubhekwe ngabomvu ukuthi amakilabhu athenge izinduku zangempela yini. Amakilabhu asuke ebhekwe kakhulu yilawa athathwa njengamakhulu okuyi-Orlando Pirates, iKaizer Chiefs neMamelodi Sundowns.
Iligi kulokhu izovulwa ngendumezulu yomdlalo lapho kuzobhekana khona iSundowns neChiefs ngoMgqibelo ngo-15h00 eLoftus Stadium, ePretoria. Lo mdlalo yiwona okuzophenywa ngawo ikhethini lokuqala kwemidlalo yeligi. Okungeke kwaqinisekiswa, wukuthi ilaphekile yini indlala yamagoli kule ligi njengoba kuhlale kukhalwa kuwona wonke amasizini.
Ngesizini edlule uPercy Tau obegijima kwiMamelodi Sundowns, noRodney Ramagalela wePolokwane City, bashaye amagoli awu-11 nje kuphela isizini yonke ukuze bahambe nesicoco samagoli. Iyihlazo le nto uma kuqhathaniswa namanye amazwe kubalwa nawakhona lapha e-Afrika. Nokho masethembe ukuthi le ligi izoza nokuhlukile kulokhu njengoba iqale ngezihibe.