UHULUMENI MAWUSIZE EMBONINI YAMATEKISI
MHLELI: Injobo enhle ithungelwa ebandla. Okuhlula amadoda kuyabikwa. Sibonile sizwile. Akukho okudlula lokhu esibone kwenzeka phakathi kweWeenen neColenso okusadingeka kwenzeke ngaphambi kokuba kusukunywe kuthathwe izinyathelo zokucisha lo mlilo osusha ubuhanguhangu.
Uma ithimba lezokuphepha eliholwa nguNgqongqoshe wezokuPhepha nokuVikelwa koMphakathi eGauteng, uNkk Sizakele Nkosi-Malobane, likwazile ukuphuma neqhinga lokunqanda umbhidlango wokubanjwa kwezimoto ezithutha imali, kangingabazi ukuthi icebo lalo lingawenza umehluko nakwezinye izimo. Umbono-ke ubheke ekutheni uma likhona ikhambi lokuthiba ukuntshontshwa kwemali, lingaba khona necebo lokubhula umlilo ohaqa impilo ebhuqwa mihla namalanga embonini yamatekisi.
Kawukwazi ukuba nobuchule ekulweni nokwebiwa kwemali, uhluleke wukuvimba ukuphalala nokugobhoza kwegazi elimsulwa.
Kusekhona okuthile okungaqhamuka nezinhlaka ezahlukene zikahulumeni ukulwa nesihlava esibi sasematekisini.
Savota sivotela abantu ukuba bezwe, balalele imibono yethu, basinakekele kunoma iyiphi impicabadala esibhekene nayo, esingakwazi ukuzisiza kuyona.
Baningi abaphila ngokusebenzisa amatekisi kodwa izinxushunxushu zakhona ziletha ubunzima kubona bonke abantu baseNingizimu Afrika.
Izinhlaka zikahulumeni nezemboni yezokuthutha umphakathi, mababhunge, bathungele injobo ebandla. Okuhlula amadoda kuyabikwa.
Kumele kwenziwe amakilasi (workshops) kunxuswe abanikazi bamatekisi ukuba ingxabano yomlomo mayingalungiswa ngenganono.
Umhobholo kawubuyiseli. Umona nokungezwani kuyimbangela enkulu yokuphalala kwegazi labangenacala.
Uhulumeni mawuqhamuke nesu lokuqeda ukubulalana ematekisini, ngale kwalokho ngizowuthatha njengesahluleki sokuqala nesokugcina.
Mnu Cyril Ramaphosa, bayaphela abantu bakaNkulunkulu bengenze lutho embonini yamatekisi. Phezani ndl’ emnyama. Sabulalana sodwa kwenzenjani?
IBhayibheli lithi: ”Zalanani nande njengezihlabathi zolwandle,” akukho lapho kuthiwa sobuye siphungulane khona. Kwakunhloboni yona lena engosomatekisi ize ibulalane yodwa? Kahleni ukuba ngamavaka, liyakhuluma igazi lomuntu, uyobe usuwedwa usubuzwa ngomuntu owambulala emhlabeni.