Kugxekwa iqembu eliqokwe yi-ASA
Kukhalwa ngokunona kwabanye abagijimi abazokuya eCroatia
UNGOTI wezokugijima waseNingizimu Afrika, uCuan Walker, ugxeka isikwati esizomela elakuleli kwi-International Association of Ultra-runners (IAU) 100km ezokuba mhla ka-8 kuMandulo (September) eCroatia.
Kuzokhumbuleka ukuthi i-Athletics South Africa (ASA) imemezele iqembu lesikhashana elizomela izwe kule midlalo ngemuva kweComrades Marathon. Abasubathi abaningi abebefakiwe balibeka ngembaba elokuthi kabayi kule midlalo. Bagxeka i-ASA ngokungayikhathaleli iRoad Running kuleli.
Umsubathi ophumele obala ngokuthi iRoad Running kayinakiwe ngu-Ann Ashworth oyingqwele yeComrades Marathon yanonyaka kwabesifazane. Abanye abahoxile bekhala ngokuthi kuneminye imi- jaho abazokuba yingxenye yayo nguGerda Steyn ongene isibili, uTanith Maxwell ongene isine noCharne Bosman onqobe iComrades ngo-2016.
UWalker ekhuluma neLANGA izolo ngeSonto, uthe lesi sikwati kasiqinile ngokwanele. Uthi i-ASA ishiye ngaphandle abasubathi abaningi abebengenza kahle yize kukhona abahoxile.
“Kangazi ukuthi ufakwe kanjani uClaude Moshiywa ngoba kule minyaka emibili edlule akenzi kahle. Ngisanda kuzwa kuthiwa ukhuluphele kakhulu kulezi zinsuku.
"ULudwick Mamabolo ngigcine kuthiwa ulimele kangazi ukuthi kuzoshaya isikhathi salo mjaho eseluleme ngokugcwele yini njengoba engenzanga kahle kwiComrades Marathon yanonyaka.
“Abantu abasefomini enhle nguBongumusa Mthembu noNkosinathi Duma. Kwabesifazane ngiba- fisela inhlanhla ngoba iNingizimu Afrika iyaqala ukuthumela iqembu labo kule midlalo. Engimfisela inhlanhla kakhulu nguFikile Mbuthuma futhi ngiyamethemba ukuthi uzokwenza kahle,” kusho uWalker.
UFikile ekhuluma naleli phephandaba, uthe ujabule kakhulu kwazise uzokube eqala ukuphumela ngaphandle kwakuleli. Uthi ngesikhathi i-ASA imfonela kuthe makandize yinjabulo. Uthi ngeke akwazi ukuphawula ngabasubathi abahoxile kule midlalo.
Selilonke iqembu lakuleli labesilisa eliya eCroatia lididiyelwe kanje: uMthembu; uMamabolo; uBest Ngwenya; uMoshiywa noDuma. Kwabesifazane: uFikile; uDeanne Horn; uLisa Collett noSalome Cooper. Izimenenja zeqembu: nguGeorge Lamb, uNick Bester, uLindsey Parry noLwethu Mabida.